Næstsíðasti þáttur í lokaseríu Game of Thrones var sýndur í nótt, klukkan eitt að íslenskum tíma. Skiptar skoðanir eru um þáttinn og fjölmargir hafa viðrað óánægju sína með hann á Twitter.

Það var hins vegar ansi margt sem gerðist í þættinum en meðal þess var að hjálmurinn fór loksins af Fjallinu, sem leikið er í þessari þáttaröð af kraftakarlinum Hafþóri Júlíusi Björnssyni.

Áhorfendur hafa ekki séð framan í Fjallið síðan í seríu fimm, eftir að Qyburn vakti hann aftur til lífs eftir að Oberyn Martell eitraði fyrir honum í seríu fjögur. Nafn Hafþórs Júlíusar hefur verið í leikaraliðinu síðan að þessi síðasta sería var opinberuð og því þótti afar líklegt að Fjallið myndi einhvern tímann missa hjálm sinn.

Hafþór Júlíus hefur leikið Fjallið, sem heitir réttu nafni Gregor Clegane, síðan í fjórðu seríu, en áður höfðu Conan Stevens og Ian Whyte farið með hlutverkið.

Við ætlum ekki að segja meira um þær aðstæður sem skapast í þættinum sem verða til þess að Fjallið missir hjálm sinn, en þeir sem eiga eftir að sjá þáttinn mega alveg hlakka til. Það eina sem við getum sagt er að Hafþór Júlíus er gjörsamlega afskræmdur þegar að hjálmurinn fær að fjúka, en vegna þess hve þátturinn er sýndur seint á Íslandi, eða snemma eftir því hvernig sem á það er litið, og margir ekki búnir að horfa þá ætlum við ekki að sýna myndina af afskræmdu andliti hans.