Ástralska söngkonan Kate Miller-Heidke segir frá því á Facebook-síðu sinni að hún hafi lent á spítala nokkrum vikum fyrir Eurovision vegna lífshættulegrar sýkingar. Kate fékk sýkinguna, sem kallast húðnetjubólga, vegna blöðru á fæti, en hún hefði geta misst fótinn eða látið lífið vegna sýkingarinnar.

„Allt út af einni blöðru. Allir sem hafa verið í háum hælum vita að þeir geta drepið – en ég tók því aldrei svo bókstaflega,“ skrifar Kate við myndir af sér á sjúkrahúsinu ásamt syni sínum, Ernie.

„Ég var föst í þessu rúmi nánast í heila viku og mátti aðeins haltra á salernið og aftur til baka. Þegar ég gerði mér grein fyrir hve alvarlegt þetta væri varð ég hrædd og komst í uppnám,“ skrifar hún.

Kate segir að undirbúningur fyrir Eurovision hafi vissulega tekið á og að hún hafi verið á ferð og flugi síðustu mánuði vegna keppninnar.

„Ég var gjörsamlega óundirbúin að plönum mínum yrði raskað með slíkri óheppni,“ skrifar hún og bætir við að fyrstu dagarnir á spítalanum hafi liðið hjá í móðu.

„En síðan kom undarleg ró yfir mig. Ég hætti að reyna að stjórna öllu. Ég hafði ekkert val. Ég ýtti bara á pásu.“

Kate hefur svo sannarlega slegið í gegn á æfingum í Tel Aviv með lagið Zero Gravity. Fyrir æfingarnar var henni spáð 16. Sæti en situr nú í því níunda samkvæmt veðbankaspám.