Bítillinn Sir Paul McCartney segist ekki hafa vitað neitt um einkalíf tónlistarmannsins Michael Jackson. Paul var spurður út í samband hans og Michael á útvarpsstöðinni Radio Futuro í Síle, í ljósi nýútkominnar heimildarmyndar, Leaving Neverland, þar sem tveir menn lýsa því kynferðislega ofbeldi sem þeir þurftu að þola af hendi Michael Jackson þegar að þeir voru barnungir.

Smellið hér til að lesa allar greinarnar um Leaving Neverland á vef DV.

Paul og Michael unnu saman að dúettnum The Girl is Mine á níunda áratug síðustu aldar, en lagið var fyrsta smáskífan af metsöluplötunni Thriller.

„Mér finnst þetta sorglegt,“ segir Paul í viðtali við útvarpsstöðina, en sagt er frá málinu á vef Metro. „Michael var klárlega frábær söngvari, frábær listamaður og frábær dansari. Við höfum elskað það í mörg ár. Enginn vissi af þessari hlið sem er sýnd í kvikmyndinni. Hann var virkilega vinalegur náungi þegar að ég þekkti hann. Ég vissi ekkert um þessa myrku hlið.“

Bítillinn segir að það hafi verið erfitt að horfa á heimildarmyndina Leaving Neverland.

„Það er erfitt að horfa til baka á allar góðu minningarnar og hugsa um allt hitt dótið sem var í gangi,“ segir hann. „Mér líður vel með að halda mig við mínar persónulegu minningar af honum. Hin hliðin er hin hliðin. Ég veit ekkert um hana. Ég skil af hverju fólk er vonsvikið og reitt yfir því að hann hafði þessa myrku hlið.“