Boxarinn Mike Tyson tjáir sig um heimildarmyndina Leaving Neverland í hlaðvarpsþættinum I Am Rapaport. Segir hann til að mynda að hann myndi aldrei leyfa yngsta barni sínu að gista hjá manni eins og Michael Jackson.

„Michael var þekktur fyrir þetta,“ segir boxarinn og vísar í sögur James Safechuck og Wade Robson í heimildarmyndinni að poppkóngurinn hafi misnotað þá þegar þeir voru börn. „Ég á átta ára gamalt barn og myndi aldrei leyfa Michael að hanga með barninu mínu. Ég myndi ekki leyfa barninu mínu að fara heim til Michael. Ég elska Michael. En þið vitið hvað ég meina?“ bætir boxarinn við.

Sjá einnig: LaToya Jackson var sannfærð um að bróðir sinn væri barnaníðingur: „Ég elska bróður minn en þetta er rangt“.

Mike og Michael voru góðir vinir og heimsótti boxarinn oft búgarðinn Neverland. Mike var dæmdur fyrir nauðgun árið 1992 og sat inni í þrjú ár og skilur af hverju foreldrar leyfa börnum sínum ekki að eyða tíma með sér.

„Það er eins og sumir segja: Sko, þú ert Mike Tyson. Ég leyfi ekki dóttur minni að vera í kringum þig því þú sast í fangelsi fyrir nauðgun,“ segir boxarinn í hlaðvarpsþættinum. „Ég virði það, ég skil það. Það er galið en ég skil það því ég myndi gera slíkt hið sama.“

Þá kennir boxarinn foreldrum þeirra James og Wade einnig um og segir að „þeir þurfi líka að bera ábyrgð á þessu kjaftæði.“

Þá telur hann ákvörðun James og Wade að stíga fram núna og segja sína sögu vera ranga.

„Það sem þið eruð að gera núna er rangt. Að tala um þessa hluti núna. Það er eins og þessir gaukar séu aðeins á höttunum eftir peningum.“