Mikil spenna ríkir nú fyrir lokakvöld undankeppni Eurovision á Íslandi sem fram fer í Laugardalshöll á laugardagskvöld. Allt stefnir í einvígi milli Friðriks Ómars og Hatara en hinir síðarnefndu virðast þó sigurstranglegri miðað við kannanir. Friðrik Ómar vakti athygli með því að leggja hjólhýsi við hliðina á Laugardalshöllinni þar sem hann heldur til í lokaundirbúningi sínum fyrir keppnina. Hatari brást hins vegar við þessu með því að leggja stærra hjólhýsi við hliðina á Friðriki Ómari.

„Ég held að hans hjólhýsi sé 5 metrar en okkar er 9 metrar, við erum auðvitað fleiri,“ segir Matthías Tryggvi Haraldsson, einn meðlima Hatara í viðtali við DV. Aðspurður hvort hann sé búinn að hitta nýja nágrannann gaf Matthías í skyn að samskipti hefðu ekki verið mikil en nábýlið færi vel af stað:

„Við í Hatara komum alltaf fram við nágranna okkar af virðingu og náungakærleik.“

Matthías segir að hjólhýsið verði einkum notað til hugleiðslu en gott sé að hugleiða í um 90 mínútur áður en stigið er á svið. „Svo kyrjum við möntrur sem við höfum lært hjá vinum okkar í BDSM-félaginu,“ segir Matthías.

Aðpurður hvort þeir væru að herma eftir Friðriki Ómari eða hefðu fengið hugmyndina að hjólhýsi  um leið og Friðrik hló Matthías og sagði: „Ég kýs að svara no comment.“

Ekki náðist í Friðrik Ómar við gerð fréttarinnar.