Félag áhugafólks um Söngvakeppni evrópskra sjónvarpsstöðva, FÁSES, ætlar að hita upp fyrir úrslit Söngvakeppninnar þann 2. mars næstkomandi með því að birta myndband á hverjum degi þar sem fimm Eurovision-sérfræðingar spá í spilin. Í fyrsta myndbandinu af fimm er byrjað á sjálfum Friðriki Ómari.
„Hann er góður söngvari,“ segir Bastien Venturi, meðlimur FÁSES, sem er ekkert alltof hrifinn af laginu samt. „Ég er ekki viss um að hann meini það sem hann syngur og þess vegna er lagið flatt,“ bætir hann við. „Það er ekki möguleiki á að það komist í úrslitakeppnina.“
Einkunn: 6 stig af 12
„Þetta er ekki alveg minn tebolli, eins og maður segir,“ segir Reynir Þór Eggertsson, betur þekktur sem Eurovision-Reynir. „Hún er mjög flott söngkona og gaman að heyra meira frá henni en ég held í rauninni að þetta lag væri kannski það síðsta af þessum fimm sem eru með í keppninni í ár,“ segir hann og bætir við að hann hefði ekki valið Mama Said sem aukalagið. „Ef að ég hefði verið í dómnefnd hefði ég valið annað lag en þetta lag sem „wild card“-ið. Ég hefði sjálfur valið Heiðrúnu Önnu og Helgi sem mér finnst afskaplega skemmtilegt lag.“
Einkunn: 3 stig af 12
„Í fyrsta lagi hljómar lagið eins og eitthvað sem hefði ekki komist inn í Melodifestivalen [sænsku Söngvakeppnina],“ segir Eurovision-aðdáandinn Marco Luis. „Mér finnst Tara æðisleg og hún er mikið efni,“ segir hann jafnframt og bætir við að honum lítist hvorki á farða Töru né klæðnað í undanúrslitum Söngvakeppninnar. Mælir hann með því að Tara reki manneskjuna sem sá um förðunina það kvöld.
Einkunn: 6 stig af 12
„Hera Björk er næstuppáhaldslagið mitt í keppninni,“ segir Konstantin Ohr, Eurovision-plötusnúður. „Lagið er ekki framúrskarandi að mínu mati en þetta er snoturt lag. Mjög vel flutt.“
Einkunn: 8 stig af 12
„Þegar ég heyrði fyrst lag Hatara fannst mér það áhugavert. Síðan kom djöflasöngurinn inn og það var í fyrstu ógnvekjandi en síðan áhugavert,“ segir Paul Lashmana. „Ég las síðan textann og hann er mjög dapurlegur en mjög 2019,“ bætir hann við. Hann horfði ekki á frammistöðu Hatara í undanúrslitum en telur að atriðið sjálft eigi ekki að vera of tilkomumikið því lagið sjálft sé sterkt.
Einkunn: 8 stig af 12
Myndbandið í heild sinni má horfa á hér fyrir neðan:
