Athafnakonan Manuela Ósk Harðardóttir og dansarinn Jón Eyþór Gottskálksson slógu í gegn í þættinum Allir geta dansað á Stöð 2 síðasta föstudagskvöld. Heilluðu þau dómara og áhorfendur upp úr skónum og eru í toppbaráttunni eftir fyrsta þáttinn.

Manuela og Jón hafa látið vel að hvort öðru síðan að æfingar fyrir þættina hófust og hafa verið uppi sögusagnir að þau séu orðin par. Þau eru allavega orðnir mjög nánir vinir eins og sást í þættinum á föstudagskvöld. Manuela hefur sjálf sagt að hún sé stressbolti og að þátttaka í þættinum taki á taugarnar en hún varpaði fram spurningu í „story“ á Instagram eftir fyrsta þáttinn. Spurði hún fylgjendur sína hvað þeir héldu að hefði verið það síðasta sem Jón hefði sagt við hana áður en þau stigu á sviðið fyrir framan alþjóð í beinni útsendingu.

Svör fylgjenda létu ekki á sér standa og voru mörg svörin ansi skrautleg.

„Viltu giftast mér?“ skrifaði einn á meðan annar skrifaði: „Ég er skotinn í þér.“ Enn annar skrifaði „Djöfull ertu heit“ og svo var einhver sem skrifaði þetta: „Ekki „falla“ fyrir mér.“

Það er því ljóst að fylgjendur Manuelu telja líklegt að hún og Jón hafi fundið ástina í örmum hvors annars. Enginn gat hins vegar giskað á það sem Jón sagði við Manuelu áður en þau sýndu dansinn sinn, en það var:

„Hey Hannah Brown! Þú ert algjörlega með þetta! Ert langflottust.“

Er þetta vísan í Bachelorette-stjörnuna Hönnuh Brown sem bar nýverið sigur úr býtum í bandarísku útgáfunni af Allir geta dansað, Dancing With the Stars.

„Af því ég er búin að tala endalaust um hvað Hannah Brown var mikil NEGLA og að ég vilji vera eins og hún,“ skrifar Manuela á „story“. Þar sem hún og Jón eru sem fyrr segir í baráttunni um toppsætið gæti vel farið svo að Manuela yrði hin íslenska Hannah Brown þegar að þáttaröðinni lýkur.

Dansinn má sjá hér fyrir neðan: