Engilbert Arnar Friðþjófsson, oftast kallaður Costco-kóngurinn, hefur verið settur í bann í hópnum COSTCO – Gleði, hópi sem hann stofnaði og telur 36 þúsund Íslendinga. Vinur hans, Erlingur, deilir þeim fregnum innan hópsins.

Svo virðist sem Facebook hafi talið Engilbert hafa farið yfir strikið í einhverri færslu hans, en hann deilir helstu kjörum í Costco. Engilbert sendi fyrrnefndum Erling skilaboð, sem kom þeim svo á framfæri. Þau hljóðuðu svo:

„Jæja þá er Facebook allt í einu farið að senda mér tilkynningar sem hljóma svona: „Your post goes against our Community Standards so only you can see it.“ Og ekki nóg með það heldur eru þeir einnig farnir að taka út aðra pósta sem ég hef verið að setja inn nýlega fyrir ykkur. Þannig þið getið ekki lengur séð þá. Ég vildi bara láta ykkur vita.“

Hann segist einungis hafa reynt að gleðja fólk: „Ég botna ekkert í þessu. Kannski er þetta vegna þess að myndirnar mínar eru farnar að telja í þúsundum  sem ég hef tekið til þess að hjálpa og gleðja sem flesta. Ég vona bara að þessi póstur sleppi í gegn því ég vildi bara segja takk. COSTCO-Gleði er síðan ykkar, þakka þér kærlega fyrir að vilja hjálpa öðrum og gleðja aðra. Þannig að þakklætið fer klárlega til ykkar. Farið vel með ykkur,“ skrifar Engilbert.

Meðlimir hópsins virðast í áfalli yfir þessum fregnum. „Engilbert Arnar er ómissandi fyrir þessa síðu,“ skrifar ein kona til dæmis. Það er óhætt að segja að þetta sé ekki í fyrsta skipti sem dramatík blossar upp innan hópsins. Fyrir tæpu ári sauð upp úr þegar Engilbert tilkynnti að hann væri hættur því hann var ósáttur við ýmislegt hjá Costo, svo sem skort á LEGO.