Ingólfsvaka er félag sem hefur það að markmiði að vekja athygli á þeirri vá sem sjálfsvíg eru í íslensku samfélagi. Þá safnar félagið fé fyrir samtök og stofnanir sem berjast gegn sjálfsvígum og veita aðstandendum stuðning. Félagið var stofnað af nokkrum vinum sem misstu góðan vin sem hét Ingólfur Bjarni. Ingólfur stytti sér aldur í september 2017. Helsta áhugamál Ingólfs var tónlist og því var algjör samhugur í vinahópnum að halda styrktartónleika undir nafninu Ingólfsvaka fyrir fjölskyldu hans í nóvember sama ár. Á þeim tónleikum komu um 10 hljómsveitir fram og Ingólfur hafði komið að flestum þeirra á einn eða annan hátt. Eftir vel heppnaða tónleika var ákveðið að gera tónleikahald undir nafni félagsins að árlegum viðburði og að ágóði tónleikahaldsins skyldi renna til málaflokksins.
Hátíðin fer fram í Leiknisheimilinu, Austurbergi 1, 111 Reykjavík.
Klukkan 20:00 hefst kvölddagskrá þar sem skemmtikraftar úr Mið-Ísland mæta. Floni, Seint, Bogdan og Ívar I, og Björk Viggósdóttir spila tónlist. Mike the Jacket endar kvöldið á frábæru DJ setti. Þá mun eldlistamaður leika listir sínar. Miðaverð á kvölddagskrá er 1500.-
Góagrill verður á svæðinu og selur veitingar gegn vægu gjaldi. Barinn verður opinn og happy hour frá 20:00 – 23:00. Boðið verður upp á ókeypis far niður í miðbæ.
Hátíðin er öll unnin í sjálfboðavinnu og í ár er hún haldin til styrktar Pieta-samtökunum.
