Ingvar E. Sigurðsson hefur unnið sín þriðju leikaraverðlaun fyrir hlutverk sitt í myndinni Hvítur, hvítur dagur.
Þessi þriðju verðlaun hlaut hann á elstu kvikmyndahátíð Kanada, FNC kvikmyndahátíðinni í Montreal. Áður var hann búinn að vinna Rising Star verðlaunin í Cannes, Frakklandi og Best Performance verðlaunin í Transilvaniu, Rúmeníu.
Mótleikkona Ingvars, Ída Mekkín Hlynsdóttir, hlaut einnig nýverið verðlaun fyrir leik sinn í myndinni á Hamptons hátíðinni í Bandaríkjunum. Hvítur, hvítur dagur hefur nú í heildina hlotið 7 verðlaun síðan hún var frumsýnd á Critics’ Week í Cannes. Þar vann hún ein af tveimur aðalverðlaunum dómnefndar.
Aukalega við leikaraverðlaun myndarinnar hefur myndin einnig unnið aðalverðlaunin á Hamptons í Bandaríkjunum, aðalverðlaunin á Motovun í Króatíu og sérstaka viðurkenningu dómnefndar á Zurich í Sviss. Myndin hefur enn fremur verið valin inn á fjölda annarra virtra hátíða, t.a.m. Toronto, Busan, BFI og Karlovy Vary.
Myndin er í forvali fyrir Evrópsku kvikmyndaverðlaunin 2019, er framlag Íslands til Kvikmyndaverðlauna Norðurlandaráðs 2019 og Óskarverðlaunanna 2020.
