Söngkonan Karitas Harpa Davíðsdóttir gaf í gær út myndband þar sem hún syngur lag Megasar, Tvær stjörnur.

Í texta með myndbandinu segir Karitas Harpa að lagið sé eitt af hennar uppáhalds, „það er eitthvað við þennan texta og laglínu sem hittir bara beint í hjartastað (ég var við það að skæla oftar en einu sinni), ég lofa ykkur að það er ekki bara út af hormónum, ekki bara allavega,“ en Karitas Harpa er ófrísk af sínu öðru barni.

„Það hjálpaði kannski ekki að sama dag fékk ég úr lagfæringu trúlofunarhring ömmu í hendurnar aftur, hann hafði ég fengið frá mömmu í útskriftargjöf rúmlega tvítug en ömmu misstum við þegar ég var einungis 11 ára og var hún einnig sú eina eftirlifandi. Ég hugsa oft og mikið til hennar, hvað ég vildi að ég hefði fengið að kynnast henni fullorðin og gæti sýnt henni allt sem ég er búin að vera að gera síðustu árin.“

„Já, það er svo fallegt með lögin þegar maður getur tengt sjálfur við þau á einhvern hátt með sínum upplifunum, lag er svo miklu meira en bara lag, það er tilfinning, minning, lykt og litir, eða allavega hjá mér,“ segir Karitas Haroa og bætir við að hún ætli að vera dugleg að deila lögum með okkur á árinu.