Morðcastið er vinsælasta hlaðvarpið á Íslandi í dag. Það er Unnur Arna Borgþórsdóttir sem hefur veg og vanda að hlaðvarpinu og fær hún til sín góðan gest í hverjum þætti, en nýr þáttur kemur alla fimmtudaga.

Unnur Arna er 28 ára gömul, lögfræðimenntuð og starfar sem bankastarfsmaður á Egilsstöðum þar sem hún er fædd og uppalin.

Í hlaðvarpinu tekur Unnur Arna fyrir íslensk og skandinavísk morð og sakamál á léttari nótum en vaninn er og yfirleitt er ekki um stærstu og þekktustu mál fyrri tíma og samtímans að ræða.

„Íslensk sakamál hafa líka alltaf heillað mig mikið, sérstaklega þar sem mér finnst oft sem það sé látið sem þau hafi hreinlega ekki átt sér stað og umræðan er lítil sem engin um þau. Með Morðcastinu vil ég þess vegna opna um þau umræðuna og gera þeim góð skil,“ sagði Unnur Arna í viðtali við Mannlíf fyrr á árinu.

Í fyrsta þættinum fer Unnur Arna yfir uppáhaldssakamál sitt, mál frá 1978. Mary Vincent, 15 ára gömul, var puttaferðalangur sem þáði far hjá karlmanni. Hann misnotaði hana, hjó af henni báðar hendurnar og skildi hana eftir í gljúfri. Mary náði að leita hjálpar og lifði af.

Þættirnir eru aðgengilegir á öllum helstu hlaðvarpsveitum eins og iTunes, Apple podcasts, Podbean, Spotify, Podcast Addict, og Pocket casts. Morðcastið má finna á Facebook, Instagram og Twitter.