Sumarið er í nánd og fara þá margir á einhverja af þeim fjölmörgu tónlistarhátíðum sem haldnar eru í Evrópu. Er þar hægt að sjá stærstu tónlistarmenn heims í rokki, poppi, rappi og danstónlist. Tónleikaþyrstir Íslendingar hafa verið heppnir undanfarin fimm ár að hafa stóra tónleikahátíð í bakgarðinum, Secret Solstice, en margir vilja breyta til og skemmta sér á erlendri grundu. Hér eru nokkrar af þeim stærstu í sumar og það sem er á boðstólum þar.
Flestir Íslendingar þekkja Hróarskelduhátíðina í Danmörku vel og hópferðir hafa verið farnar þangað um margra ára skeið. Tónlistin hefur oftast nær verið mjög blönduð og fjöldi annarra viðburða, til að mynda hið fræga berrössunarhlaup.
Dagsetning: 29. júní–6. júlí.
Stærstu atriði: Bob Dylan, The Cure, Robert Plant, Travis Scott, Cypress Hill, Robyn.
Hlustendur Rásar 2 þekkja Glastonbury-hátíðina enda hefur Óli Palli gert henni góð skil í þáttum sínum Rokklandi og Popplandi. Hátíðin er sú stærsta í Bretlandi, haldin á litlum stað í suðvesturhluta Englands. Áherslan hefur verið lögð á vinsælt popp og rokk og lítið um harðari tónlist.
Dagsetning: 26.–30. júní.
Stærstu atriði: Miley Cyrus, Kylie Minogue, Janet Jackson, Billie Eilish, Liam Gallagher, Wu-Tang Clan.
Hellfest hefur slegið bæði Wacken og Graspop ref fyrir rass, sem besta þungarokkshátíðin í Evrópu, síðan hún var fyrst haldin fyrir aðeins þrettán árum. Hún er haldin í Clisson, litlu þorpi í námunda við Nantes í vesturhluta Frakklands. Þó að Wacken sé enn þá sú fjölmennasta þá er úrvalið á Hellfest það besta.
Dagsetning: 21.–23. júní.
Stærstu atriði: Slayer, Kiss, Manowar, Tool, Def Leppard, Lamb of God, Deicide.
Ef fólk vill dansa við dynjandi teknótónlist þá er Creamfields tilvalin hátíð til að fara á. Hátíðin er haldin í Daresbury, litlum bæ nálægt Manchester og Liverpool í norðvesturhluta Englands, og er rúmlega tuttugu ára gömul. Hátíðir undir sama nafni hafa verið haldnar víðs vegar um heim, til dæmis í Moskvu, Buenos Aires og Abu Dhabi.
Dagsetning: 22.–25. ágúst.
Stærstu atriði: The Chemical Brothers, Calvin Harris, Tiesto, Martin Garrix, Adam Beyer & Cirez D.
Íslendingar hafa nýlega verið að uppgötva Sziget-hátíðina sem haldin er í Búdapest, höfuðborg Ungverjalands. Hátíðin hefur verið haldin síðan 1993 og hróður hennar vaxið með hverju árinu, aðsóknin og stærð listamanna einnig. Ekki skemmir verðlagið fyrir og hægt er að tvinna ferðina saman við tannlæknisaðgerðir sem landinn flykkist í.
Dagsetning: 7.–13. ágúst.
Stærstu atriði: Ed Sheeran, Foo Fighters, Florence & The Machine, Twenty One Pilots, Macklemore.
Bresku hátíðirnar í Reading og Leeds eru haldnar samhliða og með sömu atriðum sem víxlast á milli daga. Hátíðin í Reading á langa sögu sem nær aftur til ársins 1955 en árið 1999 var hún sameinuð V Festival í Leeds. Upprunalega var Reading djasshátíð en síðan á sjöunda áratugnum hefur áherslan alltaf verið lögð á rokktónlist.
Dagsetning: 23.–25. ágúst.
Stærstu atriði: Foo Fighters, Post Malone, The 1975, Billie Eilish, Twenty One Pilots.
Ef hip hop er það sem fólk sækist eftir þá er Wireless-hátíðin í London algerlega málið. Hún hefur verið haldin á ýmsum stöðum í borginni síðan 2005 og á hinum þekkta Finsbury Park síðan 2014. Upprunalega var nokkuð um rokkatriði en aðstandendur hátíðarinnar hafa sífellt lagt meiri áherslu á hip hop og danstónlist.
Dagsetning: 5.–7. júlí.
Stærstu atriði: Migos & Cardi B, Future, Travis Scott, Young Thug, A$AP Rocky.
