Stjórn BDSM á Íslandi biðlar til þeirra sem keyptu Hatara-búninga en hyggst ekki nota þá áfram að láta félagið frekar fá búningana en að henda þeim. Þetta segir félagið á Facebook.

„Núna þegar Eurovision æðið er að renna af landsmönnum, þá viljum við benda á að við munum með glöðu geði, taka við fatnaði, keðjum, göddum, ólum og slíku sem kann að hafa safnast fyrir í skápum, svo fátækt BDSM-fólk fari nú ekki í ólaköttinn,“ segir félagið.

Það hvetur þó fólk til að nota búningana ef það sé forvitið um BDSM. „Að sjálfsögðu hvetjum við fólk til að nota slíkan búnað áfram, á öruggan hátt, en við hvetjum til endurnýtingar ef séð verður fram á að þetta muni safna ryki. Einnig hefur Rauði krossinn gefið út að hægt sé að skila “Hatarabúningum” til þeirra. Endurnýtum!“