Hera Björk liggur núna á Landsspítalanum út áf gallsteinakasti en söngkonan tekur þátt í undankeppni Eurovision í Laugardagshöll á laugardaginn kemur.

„Ég er allavega ánægð með að þetta er núna en ekki næsta laugardag,“ segir Hera Björk um veru sína á Landsspítalanum með gallsteinakast.

„Já þetta er ferlega vont en maður þarf víst að fæða þetta eins og annað sem kemur frá manni. Fyrst hélt ég að ég væri að fá einhverja magakveisu en þegar hún bara versnaði og versnaði þá endaði með því að ég varð að fara hingað, þetta var að ganga frá mér.

„Mér leið betur þegar ég fékk skýringuna á verkjunum og verð vonandi búin að ná mér til að mæta á æfingu uppi á RUV á morgun,“ segir Hera Björk aðspurð um hvernig veikindin lýsa sér.

„Við rétt náðum að klára myndbandið sem verður frumsýnt á morgun og svo byrja æfingar aftur á morgun. Svo ef ég hefði mátt velja dag fyrir þetta í þessari viku þá hefði ég valið daginn í dag. Stundum leikur gæfan við mann í allri ógæfunni.“