Helena Christensen er vel þekkt öllum þeim sem hafa fylgst með tískubransanum síðustu ár, en hún er ein þeirra sem bera titilinn „ofurfyrirsæta,“ sem komst í notkun á níunda áratugnum eða fyrr.

Christensen, sem varð fimmtug á jóladag í fyrra, vann fegurðarsamkeppni í Danmörku árið 1986, en fyrir þann tíma var hún byrjuð að taka ljósmyndir.

Í viðtali við Glamour ræðir Christensen ferilinn og fleira. Hún ásamt fjórum öðrum ofurfyrirsætum átti eftirminnilega innkomu í fyrra á tískuvikunni í Mílanó, þegar þær gengu tískupallinn á sýningu Versace, klæddar í gullkjóla og heiðruðu þannig minningu vinar síns, tískuhönnuðarins Gianni Versace.

Í dag vinnur Christensen við ljósmyndun og samstarfsverkefni við fyrirtæki. Hún á danska móður og föður frá Perú, býr í New York, en fer alltaf til Danmerkur um sumur og jól.

Í viðtalinu talar Christensen um Ísland, sem er einn af uppáhaldsstöðum hennar, þrátt fyrir að hún hafi bara komið hingað einu sinni, og vill hún koma hingað aftur.

„Það er æðislegt, töfrandi og kalt. Ég kom til að fara á tónlistarhátíð og heimsótti auðvitað Bláa lónið sem var frábært. Ég væri til í að fara alein til Íslands einhvern tímann. Eða vinna að myndatöku þar sem ljósmyndari með fullt að töff stelpum. Mig dreymir líka um að leigja lítinn bústað á afskekktum stað og vera þar í nokkrar vikur til að fara í gönguferðir úti í náttúrunni og taka landslagsmyndir.

Viðtalið við Christensen má lesa í heild sinni hér.