Golden Globe verðlaunahátíðin fór fram í 76. skipti í Los Angeles í gærkvöldi, eða í nótt sé miðað við íslenskan staðartíma.

Kvikmyndin Bohemian Rhapsody um sögu rokksveitarinnar Queen var sigurvegari kvöldsin, en spá manna fyrir kvöldið var að kvikmyndin A Star is Born tæki flest verðlaunin, en hún fékk fimm tilnefningar.

Bohemian Rhapsody var valin besta dramamyndin og aðalleikari hennar, Rami Malek, sem leikur goðsögnina Freddie Marcury, var valinn besti karlleikari í dramahlutverki. Glenn Close var valin besta leikkonan í dramahlutverki fyrir kvikmyndina The Wife, en búist var við að Lady Gaga tæki þau fyrir A Star is Born.

A Star is Born fékk verðlaun fyrir besta frumsamda lag, Shallow.

Sandra Oh, sem var annar aðalkynna kvöldsins, ásamt Andy Samberg, var valin besta leikkonan í dramahlutverki í sjónvarpi fyrir Killing Eve. Richard Madden var valinn besti karlleikarinn í dramahlutverki í sjónvarpi fyrir Bodyguard.

Kvikmyndin Green Book fékk þrenn verðlaun, besta söngva- eða gamanmynd, besta handrit og besti leikari í aukahlutverki. Kvikmyndin, sem er með þeim Mahershala Ali og Viggo Mortensen í aðalhlutverkum, fjallar um svartan tónlistarmann sem ræður hvítan mann til að keyra sig um Suðurríki Bandaríkjanna á sjöunda áratugnum.

Olivia Colman  var valin besta leikkonan í grín- eða söngvamynd fyrir The Favourite og Christian Bale var valinn besti leikarinn í grín-eða söngvamynd fyrir Vice.

Lista yfir alla sigurvegara og tilnefningar má finna hér.