Söngvarinn Kim Larsen þurfti að aflýsa tónleikaröð í janúar s.l. þar sem sá gamli þurfti að fara í meðferð við krabbameini í blöðruhálskirtli.

Nú er meðferðinni lokið og Kim er klár í slaginn.

Mynd af Kim, og félögum hans í Kjukken bandinu, ætti að duga sem ágætis sönnunargagn um formið á söngvaranum en hann virðist nokkuð keikur þar sem hann stendur þarna stoltur með strákunum.

Hlakkar til að stíga aftur á svið

Myndin var tekin við hljómsveitaræfingu og segir umboðsmaður herra Larsens að hann hlakki ægilega mikið til að spila á tónleikum sem meðal annars fara fram í Tívolíinu í Kaupmannahöfn þann 13. júlí og á Skanderborg hátíðinni í byrjun ágúst.

Í viðtali við BT tekur umboðsmaðurinn einnig fram að auðvitað fái aðdáendur Kim eitthvað fyrir peninginn því hann myndi aldrei gera þeim það að troða upp ef hann væri ekki í flottu formi.