Þegar ég var sextán ára var ég alvarlega háð Skjá Einum (næturhrafnar voru mitt heróín) og einn af þáttunum sem ég horfði ALLTAF á var Queer Eye for the Straight Guy.

Á þeim tíma og, verum hreinskilin, enn í dag, þráði fátt heitar en að „The Fab Five“ yrðu bestu vinir mínir og myndu leiðbeina mér í gegnum lífið, enda var ég alveg einstaklega ósmart; átti skærbleikt, tuskumálað herbergi og var með dökkbrúnar og hvítar randastrípur í hárinu.

Ráðleggingar vinanna höfðu mikil áhrif á mig. Svo mikil að ég fylgi þeim enn og var alveg smávegis sorgmædd þegar þættirnir voru teknir af dagskrá. Ég tók gleði mína loksins aftur tíu árum síðar, þegar Netflix tilkynnti að fólk þar á bæ ætlaði að endurnýja seríuna með fimm nýjum strákum. Trúin á nýju þáttaröðinni var ekki mikil en það kviknaði samt strax einhver vonarneisti innra með mér.

Fyrir þau sem horfðu aldrei á upprunalegu þættina þá er kannski rétt að geta þess að Queer Eye for the Straight Guy eru raunveruleikaþættir sem stjórnað er af fimm hommum. Í nýju seríunni eru það þeir Jonathan, sem sér um hár og húð, Tan, sem sér um fatnaðinn, Bobby, sem sér um innanhússhönnun, Antoni, sem sér um mat, og Karamo, sem sér um menningu og innri yfirhalningu.

Í hverjum þætti er einn karlmaður tekinn fyrir og íbúð, útlit og líf hans er gert upp á bæði fyndinn og hjartnæman hátt (hjartnæmt lesist: ég horgrenja yfir um það bil öðrum hverjum þætti).

Fyrsti þátturinn í nýju seríunni vann mig alveg á band hinna nýju frábæru fimm eða „fab five“ og það var að stóru leyti viðfangi fyrsta þáttarins að þakka. Hinn allt of krúttlegi Tom er bara of mikið æði og fær alla til að brynna músum. Sáttina má líka þakka því sem Tan, tískugúrú þáttanna, segir alveg í byrjun: „Upprunalegi þátturinn barðist fyrir umburðarlyndi meðan okkar barátta snýst um samþykki.“ Þessi setning gefur góðan grunn að því hvernig þessi þáttaröð er frábrugðin hinni upprunalegu. Þótt Tom muni alltaf eiga hjarta mitt þá héldu hinir níu þættirnir vel dampi og varð ég sjálf alveg sérstaklega skotin í Neal og AJ.

Í þessari seríu eru allir karlmennirnir sem teknir eru fyrir frá fylkinu Georgíu í Bandaríkjunum, þar sem hómófóbía og kynþáttafordómar eru miklir. Þeir eru flestir hvítir og gagnkynhneigðir og það verður til þess að fordómar eru undirliggjandi umræðuefni í öllum þáttunum í nýju seríunni. Það sem nýju þættirnir hafa líka fram yfir gömlu þættina er að tekið er mun meira tillit til persónu, áhugamála og smekks hvers og eins karlmanns sem tekinn er fyrir, svo fjölbreytnin er mikil.

Þó að gömlu Queer Eye muni alltaf lifa í fortíðarljóma hjá mér, og Carson Kressley verði alltaf mín eina sanna ást, þá verð ég að segja að nýju þættirnir gerðu meira en að standast væntingar mínar og ég mæli heilshugar með þeim fyrir alla sem hafa gaman af raunveruleikasjónvarpi, hönnun, tísku, lífsstíl, matargerð og góðri stemningu. Mundu bara að hafa nóg af tissjú við höndina áður en þú byrjar að horfa!

Af fimm stjörnum þá fá nýju þættirnir Queer Eye for the Straight Guy 4 ½ stjörnu frá mér.