Erkifjendurnir Sylvester Stallone og Dolph Lundgren, sem áttust við í kvikmyndinni Rocky IV árið 1985, sameinast nú aftur á hvíta tjaldinu í Creed II, sem er „spin-off“ af Rocky myndabálknum.

Lundgren bregður sér aftur í hlutverk Ivan Drago og segir hann í viðtali við Sky News að það hafi verið gaman að vinna aftur með Stallone, sem Lundgren, segir einn af þeim vitrustu í bransanum.

„Hann er góður gaur, mjög klár, fyndinn og hnyttinn. Þú veist af því að hann leikur þessa karaktera, sem segja ekki mikið, þá heldur fólk að hann sé þannig, en svo er ekki, hann er mjög klár. Einn sá klárasti í Hollywood.

Þú skapar ekki þrjú stórvirki, Rocky, Rambo og The Expendables, með því að vera heimskur, þannig er það bara.

Hann hefur gert það og hver annar? Kannski Spielberg og Lucas.“

Myndin er önnur í röðinni, en Creed kom út 2015. Myndin verður sú áttunda í sagnabálkinum um Rocky, en þá fyrstu skrifaði Stallone skítblankur í leit að næsta hlutverki. Þegar handritið komst loksins á koppinn hjá framleiðendum þurfti Stallone að berjast fyrir að fá að leika tiltilhlutverkið. Allir vita hvernig það tókst til og Stallone tók óskarsstyttuna heim 1976. Er myndin talin ein af bestu íþróttamyndum allra tíma.

Myndin er sú fimmta sem félagarnir vinna að saman, en Lundgren lék einnig í þremur The Expendables myndum. „Þessi er svolítið öðruvísi af því að núna erum við aftur andstæðingar, líkt og í fyrstu myndinni.“

„Síðan gerðum við þrjár Expendables myndir, sem eru fyndnari en þessi fyrsta, og við erum bara að skiptast á bröndurum og skjóta af byssum og hlaupa um, á bátum og eitthvað, þyrlum. Núna erum við með senur þar sem við sitjum saman og eigum samtal sem fyllir nokkrar blaðsíður. Þetta er meira svona leikari með meðleikara.“

Florian Munteanu, leikur Viktor Drago, son Ivans og segir hann um myndina að hún hafi verið „frábær reynsla og heiður að vinna með goðsögnum og einnig yngri leikurunum.“