Hvernig bregðast ungir körfuboltadrengir við þegar þeir fá körfuboltaspjald með mynd af konu? Þetta er spurningin sem Pálmar Ragnarsson þjálfari varpar fram en hann birti myndband á samskiptamiðlinum Instagram þar sem hann framkvæmdi tilraun í tengslum við ímynd stráka gagnvart íþróttakonum.

Pálmar þjálfar yngri flokka Vals í körfubolta og hefur einnig haldið fyrirlestra um þjálfun barna sem hafa slegið í gegn. Hann er alltaf að finna leiðir til að breyta hugarfari krakkanna og það nýjasta var að sýna strákunum að konur eru líka góðar í íþróttum.

Hann ákvað að gefa strákunum sem hann þjálfar körfuboltaspjöld með myndum af konum og velti fyrir sér hvort þeir myndu bregðast öðruvísi við en þegar þeir fá mynd af karli eins, og þeir eru vanir, eða hvort þeim þætti ekkert athugavert við þetta.

„Ég trúi svo einlægt á það að ef ungir strákar fá þessi skilaboð um að konur og karlar séu jafnflott í íþróttum, í gegnum barnæskuna, í gegnum unglingsaldurinn, þá ölum við upp íþróttafólk sem ber jafnmikla virðingu fyrir konum og körlum,“ segir Pálmar í myndbandinu.

„Við getum haft áhrif á hugarfar ungra drengja til frambúðar einfaldlega með því hvernig við tölum um hlutina. Tölum markvisst um íþróttir kvenna af virðingu við alla drengi sem æfa íþróttir, bæði börn og unglinga.“

Útkomuna má sjá í myndbandinu hér fyrir neðan.