„Það að þurfast í augu við sjálfan þig sem veikan og falinn,og það að ná þér aftur og koma þér saman er mikill sigur,“ segir tónlistarmaðurinn Högni. „Þá ertu um leið með tungumál til þess að skapa með.“

Högni er einn fjögurra tónlistarmanna sem sýna á sér nýja hlið í annarri þáttaröð Trúnó, sem snýr aftur í Sjónvarpi Símans Premium 21. Desember. Aðrir viðmælendur eru Gunnar Þórðarson, Mugison og Raggi Bjarna.

Þeir segja okkur frá hlutum og viðburðum í þeirra lífi sem hafa mótað listsköpun þeirra í tónlist með einlægum hætti, segja frá hlutum sem þeir hafa ekki talað um áður.

„Þetta eru draumaviðmælendur sem ég fékk í báðum seríunum. Tónlistin þeirra er svo stór hluti af lífi okkar allra. Mig langaði að hafa þættina í eldhúsinu heima hjá þeim og komast að kjarnanum um lífið og listina,“ segir Anna Hildur.

Allir fjórir þættirnir verða aðgengilegir í Sjónvarpi Símans Premium 21. desember en þeir eru framleiddir af Tattarrattat fyrir Símann. Hugmynd og handrit þáttanna á Anna Hildur Hildibrandsdóttir, en leikstjóri og tökumaður er Margrét Seema Takyar.