Hrafn Gunnlaugsson leikstjóri og lífskúnster ökklabrotnaði fyrir nokkru og segir frá því á Facebook-síðu sinni að hann hafi vantað hjólastól til að komast um.

„Hringdi á alla í símaskránni,“ segir Hrafn, og bætir við að verðin á hjólastól hafi verið frá 79.800 – 140.000 kr. Eftir ábendingu frá pólskri ræstingakonu hringdi hann í Costco og þar var til ein tegund af hjólastól og verðið ekki amalegt að sögn Hrafns, 17.900 kr., sem telst næstum gjöf en ekki gjald.

Yaira sambýliskona Hrafns fór og sótti stólinn og er Hrafn búinn að rúlla um á honum í vel á annan mánuð að eigin sögn.

„Fyrir mig er stóllinn algert masterpís,“ segir Hrafn og ætlar að drífa sig sjálfur í Costco þegar hann er orðin rólfær.

Einn vina Hrafns skrifar athugasemd um hvort hann hafi ekki getað leigt sér hjólastól.

Tvö fyrirtæki leigja út hjólastóla.
Hjá Stoð hf. er lágmarksgjald fyrir 7 daga notkun 9.800 kr. Hver dagur umfram það kostar 900 kr. á dag. Tveggja mánaða leiga væri því um 58.000 kr.
Hjá Hjálpartækjaleigu Sjálfsbjargar er verðið fyrir mánuð 19.900 kr. Tveggja mánaða leiga er því 39.800 kr.

Hrafn gerði því kostakaup með kaupunum í Costco.