Í febrúar lést Randy Zimmerman í mótorhjólaslysi, en hann og unnusta hans, Debbie Gerlach, voru búin að ákveða að ganga í hjónaband 11. nóvember.
Gerlach ákvað að heiðra minningu unnusta síns með því að fara í myndatöku í brúðarkjólnum rétt fyrir áætlaðan brúðkaupsdag. Hún fékk ljósmyndarann Kristie Fonseca til að mynda hana líkt og um brúðkaupsmyndatöku væri að ræða. Síðan notaði hún gamlar myndir af Zimmermann og „fótósjoppaði“ hann inn á myndirnar.
„Hún stóð sig einstaklega vel og átti ekki í neinum vandræðum með að setja sig í stellingar, sem ég gat unnið með,“ sagði Fonseca í viðtaði við Yahoo Lifestyle.
Gerlach birti myndirnar á Facebook-síðu ásamt hjartnæmri kveðju til látins unnustans: „Dagurinn í dag átti að vera besti dagur lífs míns. Dagurinn í dag átti að vera dagurinn sem ég giftist besta vini mínum. Dagurinn í dag átti að vera dagurinn sem mig hefur dreymt um frá því ég var lítil stúlka. Í dag átti ég að verða eiginkona, frú Zimmerman…..en í dag vaknaði ég ein, eins og ég geri alla daga. Í dag vaknaði ég með hjartasár enn og aftur.“
