Ævar Þór Benediktsson, eða Ævar vísindamaður, er afkastamikill listamaður.

Nýlega kom nýjasta bók hans, Þitt eigið tímaferðalag, í verslanir og Þitt eigið leikrit – Goðsaga verður frumsýnt snemma á næsta ári í Þjóðleikhúsinu.

Í einhverjum af fyrstu 1000 bókunum leynast 10 gullmiðar sem eru ávísun á ævintýralega leikhúsferð á sýninguna.

Miðarnir eru engir venjulegir leikhúsmiðar. Í fyrsta lagi mun Ævar fara með gullmiðahöfunum á sýninguna. Hann mun fara með þeim baksviðs og sýna þeim hvernig sýningin varð til og í þriðja lagi fá þeir að hitta alla leikarana eftir að sýningunni lýkur og spjalla við þau. Þetta verður dagur sem mun seint líða úr minni.

Bækurnar hans Ævars þar sem lesandinn ræður för eru flestum ef ekki öllum íslenskum barnafjölskyldum að góðu kunnar. Það er því einstaklega
spennandi og krefjandi verkefni að setja upp leikrit sem byggir á sömu hugmyndafræði þar sem áhorfendur ráða ferðinni. Þannig verður hver sýning einstök og útkoman ólík.

Sýningin er sú tæknilegasta sem sett er upp í Þjóðleikhúsinu á þessu leikári og hvergi er slegið af til að hún verði tilkomumikil og áhrifarík.

Það má með sanni segja að aðdáendur Ævars bíði óþreyjufullir eftir þessari sýningu því þegar er uppselt á fyrstu sjö sýningarnar.

Ævar Þór var í viðtali við DV í ágúst, sem lesa má hér: Ævar Þór:„Þegar mistökin eiga sér stað verður þú að læra af þeim“