Nýlega skrifuðu Sóley Organics snyrtivörur og Skógræktin undir 20 ára samning til að tryggja og undirbúa fyrirhugaða aukningu Sóley Organics.

„Þetta er frábært fyrir báða aðila, þar sem Skógræktin er ánægð að það er verið að nýta það sem fellur til við grisjun og nýtingu skógana á ábyrgðarfullan hátt með lífrænni vottun og Sóley Organics tryggir sér jurtir fyrir fyrirhugaða aukningu um komandi ár,“ segir Vala Steinsdóttir framkvæmdastjóri Sóley Organics.

Um snyrtivörurnar

Sóley Organics snyrtivörur eru vottaðar náttúrulegar og lífrænar af bæði Ecocert, sem er stærsta vottunarstofa Evrópu, og Tún sem vottar íslenskar landbúnaðarvörur. Fjölskylda, vinir og starfsfólk kemur saman og tínir villtar jurtir af vottuðum svæðum, undir dyggri stjórn Eyglóar dóttur Sóleyjar. Eygló er okkar reynslumesti tínari. Vörurnar eru svo framleiddar á Íslandi, með fersku vatni, endurnýtanlegri orku og eru lausar við öll efni sem gætu veitt náttúrunni og mönnum skaða.

Upphaf Sóley Organics

Konan að baki Sóley Organics er Sóley Elíasdóttir en hún starfaði áður sem farsæl leikkona til fjölda ára. Sóley á ekki langt að sækja áhugann og þekkinguna á íslenskum lækningajurtum því að baki henni standa margir ættliðir grasalækna og nokkrir þeirra hafa orðið meðal þekktustu alþýðuhetja á Íslandi. Það kom því engum á óvart að Sóley skyldi taka upp þráðinn frá langalangömmu sinni, Grasaþórunni (Þórunni Gísladóttur) og hefja framleiðslu smyrsla, eftir aldagamalli uppskrift sem varðveist hafði í fjölskyldu Sóleyjar. Sóley vildi nýta uppskriftina sem grunn að línu snyrtivara sem væru náttúrulegar, lífrænar og góðar fyrir umhverfið. Í snyrtivörunum eru villtar og kraftmiklar íslenskar jurtir; birkir, víðir, vallhumall og sortulyng. Þær eru uppistaðan að vörulínunni sem samanstendur af hágæða húð- og hárvörum sem hafa verið í stöðugri þróun frá árinu 2007.