Út er komin sjötta bók Dags Hjartarsonar, Því miður.
Skáldið leitar víða fanga í sinni nýjustu bók. Þó má segja að rauði þráðurinn í Því miður sé það sem brennur og svo hitt sem er hljóðritað. Með öðrum orðum: Bókin er eins konar andartaks málverk af landslagi samtímans; heimsendaspá og hjartalínurit.
Því miður eru allir þjónustufulltrúar okkar
á kafi í helförinni.
Þeir horfa á kvikmyndir,
hlusta á podcöst,
gúgla hræðilegar ljósmyndir,
lesa sér til um nasismann
og afleiðingar þess að afgreiða
símtöl
og vandamál
í þeirri röð sem þau berast.
Dagur vakti athygli fyrir sína fyrstu ljóðabók, Þar sem vindarnir hvílast (2012), en fyrir hana hlaut hann Bókmenntaverðlaun Tómasar Guðmundssonar. Fyrir skáldsöguna Síðasta ástarjátningin (2016) var Dagur tilnefndur til Bókmenntaverðlauna Evrópusambandsins og ljóðabókin Heilaskurðaðgerðin (2017) fékk einróma lof gagnrýnenda, fimm stjörnur í Fréttablaðinu og fjórar og hálfa stjörnu í Morgunblaðinu. Þá hlaut Dagur Ljóðstaf Jóns úr Vör 2016 fyrir ljóðið Haustlægðin.
Í Því miður kveður við nýjan tón.
Bókin er 50 blaðsíður og verður kolefnisjöfnuð.
Tunglið forlag gefur út.
