UN Women vekja athygli á He for She, átaki um kynbundið ofbeldi, með nýrri auglýsingu þar sem tólf karlmenn lesa upp frásagnir kvenna sem hafa upplifað ofbeldi. UN Women vilja með átakinu vekja karlmenn til vitundar um mikilvægi þess að þeir beiti sér markvisst gegn ofbeldi gegn konum og fordæmi það.
Sögur kvennanna komu frá Íslandi, Víetnam, Úsbekistan, Gambíu og Mjanmar. Það sem karlmennirnir vissu ekki var að ein konan sat á móti þeim þegar frásögn hennar var lesin.
Karlarnir sem taka þátt eru Ólafur Stephensen, Króli (Kristinn Óli Haraldsson), Sævar Helgi Bragason, Bjarni Snæbjörnsson, Valur Freyr Einarsson, Pablo Santos, Guðjón Svansson, Ásberg Jónsson, Sigurður Svavarsson, Pétur Finnbogason, Freyr Alexanderson og Stefán Gunnar Sigurðsson.
UN Women vildu vísvitandi ögra karlmönnum
Í tilkynningu frá UN Women kemur fram að UN Women hafi vísvitandi farið ögrandi leið til að hreyfa við karlmönnum í þeirri von að þeir muni setja sig í spor þolenda.
Því hafa UN Women tekið saman ýmis ráð sem fylgja átakinu, eins og:
• Gríptu inn í aðstæður ef þú verður vitni af kynferðislegu ofbeldi og áreitni
•Taktu samtalið ef þú þekkir nákominn geranda og hvettu hann til að leita sér hjálpar
• Segðu frá og útvegaðu stuðning þegar þú verður vitni að kynbundnu ofbeldi og áreitni
• Hringdu á lögreglu ef grunur liggur á heimilisofbeldi
• Tilkynntu hefndarklám og netníð sem þú verður vitni að
•Fordæmdu kynbundið ofbeldi í nafni allra kvenna
UN Women hvetur alla til að taka þátt og fordæma kynbundið ofbeldi í nafni; mömmu, systur, eiginkonu, vinkonu, dóttur þinnar eða allra kvenna á heimasíðu unwomen.is.
Lestu einnig: „Ég hef ekki vald í dag til að vernda barnið mitt og heimili fyrir ofbeldi en við sitjum uppi með afleiðingarnar“
