Ragga Nagli er klínískur heilsusálfræðingur og einkaþjálfari. Á Facebook heldur hún úti vinsælli síðu þar sem hún birtir reglulega pistla um hreyfingu, mataræði og fleira. Í þessum fjallar hún um hvernig almenningsálit getur skapað brenglaða sjálfsmynd.
Konur senda myndir af sjálfum sér út í kosmósið af sínum eigin reikningi á graminu… instagramminu.
Í kjölfarið eru myndirnar teknar í gíslingu af öðrum reikningi og lesendur þar beðnir að lýsa skoðun sinni á skrokklegri hollningu.
Gefa líkamanum einkunn frá 1 til 10.
Líkami kvenna er hlutgerður eins og stafsetningastíll í Melaskóla
Bakvið öryggi tölvuskjás hamast fingurgómar á lyklaborðum og skoðanir streyma út.
Í orðum sem hrósa. En líka orðum sem meiða.
„Of vöðvuð.“
„Of mjúk.“
„Ekkert kvenlegt við hana.“
„Karlmaður með brjóst.“
„Ojj þetta er ekki fallegt.“
„Hún er eins og gæra til fara.“
Í einu vetfangi er sjálfstraust og sjálfsmynd konu sett í steypuhrærivél.
Það er í eðli mannskepnunnar að hljóta viðurkenningu frá hjörðinni. Að fá sannfæringu um að þeir samþykki þig.
Þegar þú heyrir síðan að þú sért ekki nógu….. elur það á ótta og óöryggi um höfnun frá hjörðinni.
Huglægt mat frá frústreraðri sál með krepptar tær í flókaskóm getur auðveldlega gert sjálfsmyndina að Toro súpudufti á örfáum sekúndum.
Sérstaklega hjá óharðnaðri æskusál sem síðan fylgir út lífið.
Og upphefst darraðardans við djöfulinn um að lagfæra skrokkleg atriði sem hópnum mislíkar.
Brengluð líkamsmynd ásamt óheilbrigðu sambandi við mat og æfingar er vanalega afleiðing.
Eina manneskjan sem hefur rétt á að hafa skoðun á líkama þínum…. ert ÞÚ.
Sá eini sem getur metið gildi þitt, virði og stefnu sem manneskju ert ÞÚ.
Skrokklegt útlit er ekki það sem skilgreinir verðleika okkar.
Ertu vinamargur.
Frændrækinn.
Gott foreldri.
Góður vinur.
Umhyggjusamur maki.
Við erum svo miklu meira en skelin.
Takk fyrir tíkall….
