Í eftirfarandi myndasyrpu má sjá hvernig íbúðir þeirra Carrie, Samöntu, Charlotte og Miröndu myndu líta út nú árið 2018, tuttugu árum eftir að þessir sögulegu þættir fóru fyrst í loftið.
Hönnuðir á vegum Modsy.com tóku sig til og stíliseruðu sömu íbúðina út frá karakter einkennum fjórmenninganna sem voru hver annari ólíkar þó allar væru þær bestu vinkonur.
Útkoman er mjög skemmtileg.
Eins og sjá má á nýju íbúðinni hennar Carrie er haldið í litapallettuna sem hún hafði í fyrri íbúðinni, ljósir og gráir pastellitir í bland við einfalda og kvenlega tóna.
Húsgögnin eru nútímaleg og töluvert minimalískari en það sem við sáum í gömlu íbúðinni og auðvitað er hún með skrifborð í svefnherberginu, enda sérfróð um ástar -og kynlífsmál.
Og að lokum… hvernig væri íbúðin hennar Carrie Bradshaw ef ekki væri fyrir Carrie hálsmenið, ferðakaffibollann, tutu pilsin og Vogue blöðin?
Villikötturinn Samantha Jones var alltaf stolt og sjálfsörugg dama sem elskaði kynlíf og þoldi ekki kjaftæði.
Hún var líka algjör glamúr-lemúr sem elskaði gull og glys um leið og hún passaði að sjálfssögðu alltaf að vera mátulega klassý.
Íbúðin hennar árið 2018 er einföld og minimalísk um leið og glamúrinn fær að njóta sín í botn.
Hún velur efni á borð við leður, skinn og flauel til að ná fram munúðarfullum áhrifum en allir sem til þekkja vita hversu hrifin hún Samantha er af kynlífi.
Taktu sérstaklega eftir litasamspilinu milli græna sófans og gyllta ljóssins sem kemur mjög fallega út. Dökkmálaðir veggirnir njóta sín einnig vel á móti hvítum listum.
Charlotte var alltaf þessi pena og prúða vinkona. Íhaldssöm og augljóslega hrifin af rómantík og fortíð.
Taktu sérstaklega eftir gólfmottunum hjá Charlotte, gler skrifborðinu og fallega ljósinu sem hangir fyrir ofan rúmið hennar.
Karakterinn hennar Miröndu er frekar svona stífur og jarðbundin og hún er ekkert að vinna með neitt óþarfa bruðl.
Hún vinnur með jarðliti og einfaldleika í sinni íbúð og velur húsgögn sem endast vel en eru látlaus og stílhrein.
Að sjálfsögðu velur þessi týpa sér plöntur sem hún þarf ekki að vökva neitt allt of oft enda hefur hún margt annað að gera en að sinna plöntum.
