„Kæru Vesturbæingar. Nú er HM að hefjast og af því tilefni ætla Brauð&co, Hagavagninn, Kaffihús Vesturbæjar og Melabúðin að standa fyrir skemmtilegu Vesturbæjar-áhorfi á leiki íslenska liðsins,“ skrifar Gísli í sérlegan Facebook hóp fyrir íbúa Vesturbæjarins.
„Við ætlum að setja upp risaskjá á sundlaugartúnið (austanmegin, þar sem Hagavagninn er) og langar til að hvetja alla Vesturbæinga til að koma þangað og horfa saman á leikina og hvetja okkar menn til dáða!,“ skrifar hann um leið og hann hvetur íbúana til að mæta með teppi og tjaldstóla og hafa það huggulegt saman yfir leikjunum.
„Við sjáum þetta sem kjörið tækifæri fyrir hverfið og fjölskyldur til að gera eitthvað skemmtilegt saman og skapa góðan hverfis-anda. Nú er bara að hugsa hlýlega til veðurguðanna og fá smá hlé á rigningunni og þá getum við átt frábæra og eftirminnilega upplifun í hverfinu okkar,“ skrifar Gísli sem eins og allir vita er einlægur áhugamaður um borgarmenningu og sérlega góður í að skapa fína stemmningu eins og sést hefur í föstudagsþáttunum hans, Vikan með Gísla Marteini.
Að lokum tekur Gíslil fram að hann sé ekki að auglýsa nein viðskipti:
„Við erum eingöngu að stússast í þessu til að skapa skemmtilega stemningu í hverfinu okkar og vonum að sem flestir taki þátt í því með okkur. Áfram Vesturbærinn og áfram Ísland!“
