Segja má að Birna hafi farið nokkuð ótroðnar slóðir í sinni markaðssetningu:
„Ég hef verið að leika mér að því að opna Pop Up verslanir hingað og þangað um bæði Kaupmannahöfn og Reykjavík síðustu árin og þetta hefur bæði gengið vel og verið mjög skemmtilegt,“ segir Birna sem hannar ekki fatalínur fyrir vor, sumar, vetur og haust eins og tíðkast hjá mörgum:
Nei ég vil gera þetta aðeins öðruvísi. Hanna bara til eina og eina flík sem er klassísk og hefur fjölþætt notkunargildi. Hægt að nota bæði spari og hversdags og tekur svolítið mið af því efni sem ég geri hana úr.“ segir Birna sem er mjög vandlát á efnin sem hún kaupir.
„Stundum fæ ég tíu metra af einhverju fallegu efni og stundum tuttugu metra og þannig verða sumar flíkur til í fleiri eintökum en aðrar. Flíkurnar verða þó aldrei fleiri en tuttugu og fimm af hverri gerð. Þá ég við lit, prent og snið. Markmiðið er semsagt að búa aðeins til takmarkað upplag af flíkum úr sérstökum efnum sem ég finn á mörkuðum,“ segir Birna Karen sem lætur svo sauma flíkurnar á litlum saumastofum í Póllandi en þar hafa konurnar tíma til að sauma inn á milli árstíða hjá stærri framleiðendum.
„Ég er löngu kominn úr þessu fjöldaframleiðslu dæmi enda hefur það ekki höfðað til mín í mörg ár. Svo erum við þannig að við viljum ekkert endilega vera í eins fötum og allir hinir. Fólk sem kaupir mína hönnun er að kaupa hana beint af mér, þannig að þetta er alveg milliliðalaust og þar með miklu ódýrara en annars,“ segir Birna að lokum.
Pop-up verslun Birnu í hönnunarbúðinni Akkúrat stendur til 17 júní og er opin virka daga frá 10-19, laugadaga 10-18 og sunnudaga 11-17.
