Stundum skrifar Orðið á götunni sig sjálft. Í þetta skiptið er notast við hugleiðingar Baldvins Jónssonar, en hann er tengdafaðir fjármálaráðherra, Bjarna Benediktssonar, samkvæmt niðurstöðu ættfræðisviðs Frjálsrar fjölmiðlunar.

Baldvin, sem hefur víðtæka reynslu úr viðskiptalífinu og þykir vel tengdur, skrifar á Facebook síðu sína hvað verði um WOW eftir gjaldþrotið, sem teljast verður nokkuð fróðlegt, ef rétt reynist.

Baldvin skrifar:

„Orðið á götunni segir að tugir ferðafyrirtækja séu nú að safna fjármunum og ábyrgðum vegna lántöku og geri tilboð í WOW. Dreifð eignaraðild. Gert er ráð fyrir ca. kr. 10.000.000 að meðaltali. Hugmyndin er að reka félagið einsog önnur almennings farartæki svo sem strætó og lestar.
Gert er ráð fyrir að verð miðist við vegalengd og verði föst verð miðað við $ gengi. Yfirbygging verði í lágmarki og leitað eftir samstarfi við önnur félög með þjónustu á jörðu niðri. Almenningi verði einnig gefinn kostur á kaupum.
Aðeins verður boðið uppá einn klassa einsog í strætó. Fólk geti keypt miða á flugvelli en líka pantað á netinu. Fyrstur kemur fyrstur fær. Reikna menn með 4 til 6 áfangastöðum í byrjun og myndarlegt eigið fé.
Fyrir nokkrum árum nam flugkostnaður um 50 til 60% af ferðakostnaði miðað við vikuferð. Nú er þessi hlutur orðinn um 20% af ferðakostnaði. Ferðamenn eyði sínum peningum á jörðu niðri og flug sé bara strætó eða lest og lágmarksþjónusta.
Þeir sem standa að þessu munu því vilja fara ótroðnar slóðir ef ég skildi þetta rétt og vekja það mikla athygli að fólk segi: WOW.“