Orðið á götunni er að það sé farið að hitna verulega undir Degi B. Eggertssyni borgarstjóra. Braggablúsinn svokallaði hefur reitt borgarbúa til reiði, þar sem daglega upplýsist um nýtt hneyksli tengt bragganum, sem á endanum gæti endað sem lögreglumál, þegar bókhaldið verður skoðað.
Eyþór Arnalds hefur kallað eftir afsögn Dags, þar sem hann sé jú æðsti yfirmaður og framkvæmdastjóri borgarinnar. Hann hafi átt að sjá hvernig málum var háttað, útboðsreglur hafi verið brotnar og Dagur hafi fengið öll gögn í hendurnar til að meta málið sjálfur. Gildir þá einu hvort Dagur hafi lesið gögnin eða ekki, hvort tveggja teljist afglöp í starfi.
Hitinn undir borgarstjórastólnum virðist hafa haft beinar afleiðingar á heilsu borgarstjóra, sem mætti ekki í Kastljósið í gær sökum flensu. Dagur þótti hrókur alls fagnaðar á þriðjudagskvöldið, í teitinu án Yoko Ono eftir að að Friðarsúlan var tendruð, en líklega hefur slegið að honum í Viðey.
Í hans stað mætti Þórdís Lóa Þórhallsdóttir, oddviti Viðreisnar, sem virtist átta sig á því með hverri mínútunni sem leið, að mögulega hefði hún betur afþakkað Kastljósboðið sjálf, svona í ljósi þess að hún virtist álíka gagnleg og dúnmelur í svörum sínum. Henni er vissulega vorkunn því hún vissi ekki af málinu fyrr en í ágúst og getur sök hennar því varla talist mikil í málinu. Sem hlýtur að teljast hentugt ef hún væri borgarstjóri.
Og talandi um Þórdísi Lóu sem borgarstjóra…
Orðið á götunni, réttara sagt innan úr ráðhúsinu, er að Dagur hyggist draga sig í hlé sem borgarstjóri og fara í veikindaleyfi. Sem kunnugt er greindist hann með fylgigigt fyrr á þessu ári, sem er sjaldgæfur gigtarsjúkdómur sem leggst á slímhúðina í líkamanum. Álagið sem fylgir slíkum veikindum getur verið mikið og ekki bætir úr skák álagið sem fylgir því að þurfa að svara fyrir afglöp embættismanna sinna í óþægilegum málum.
Orðið á götunni er að Þórdís Lóa muni taka við af Degi og því hafi Kastljósið verið einskonar forsmekkur af því sem koma skal.
Vonandi fást þó einhver svör frá Degi sem fyrst, svona þegar hann hefur braggast af flensuni.
