Sigurður Brynjar Pálsson, forstjóri BYKO, lauk í vor meistaraprófi í húsasmíði, sem kemur sér vel vegna þess að hann er sjálfur að reisa sér hús. Sigurður kynntist byggingariðnaðinum ungur og hefur alltaf haft áhuga á því að byggja og búa til. Byggingariðnaðurinn hefur breyst gríðarlega mikið og flækjustigið aukist. Sigurður er gestur Ólafs Arnarsonar í hlaðvarpi Markaðarins.
Hér má hlusta á brot úr þættinum:
Nú er sumar, þá er mikið að gera í byggingabransanum og þá er mikið að gera hjá ykkur, byggingavöruverslunum. Þetta er svona vertíðin, er það ekki, má segja?
„Jú, jú, að mörgu leyti að sumarið sé tíminn. En þá má segja það að byggingavörumarkaðurinn hefur þróast svolítið eins og ferðaþjónustan, kúrfan hefur aðeins jafnast út. Og það kemur auðvitað til líka bara af byggingaraðferðum og en sumarið vissulega er okkar árstími.“
Þú hefur stýrt BYKO núna í 12 ár, það hefur verið viðburðaríkur tími. Það hefur náttúrlega komið heilt Covid, heimsfaraldur, þar sem mikið breyttist og aðfangakeðjur brustu og svo náttúrlega ímynda ég mér að umbrotin í Grindavík og þarna nágrenni Grindavíkur og það tjón og svona sem hefur orðið á byggingum, þið merkið það einhvern veginn, verðið varir við það. Og það hefur margt breyst á löngum tíma. Ég man eftir því að þegar ég var í byggingavinnu, sumarvinnu sem svona strákur, menntskælingur, þá var þetta kannski stór verktakabissness, það voru tveir smiðir og svo vorum við tveir sumarguttarnir sem vorum svona nokkurs konar handlangarar. Þetta er aðeins öðruvísi í dag, er það ekki?
„Jú, sannarlega, þetta hefur breyst á má segja öllum sviðum. Ég, eins og þú, ólst upp í byggingarvinnu hjá afar góðum verktaka sem sem leyfði manni að gera ýmislegt og þá voru ekki þessar miklu kröfur eins og við þekkjum í dag, byggingaraðferðir hafa breyst mjög mikið bæði í vörum og í aðferðum. Við getum haldið áfram að telja upp bæði í byggingarreglugerðinni, í öllu skipulagsmálunum, þetta hefur tekið gjörbreytingum. Það var sagði mér nú einn verktaki hérna um daginn, sem man tímana tvenna, að hann man það þegar hann fór til Magnúsar Snædal niður í Borgartún þar sem byggingafulltrúinn úr Reykjavík var til húsa. Hann fór inn á þriðjudegi og lagði inn teikningar og viku seinna sótti hann þær stimplaðar.
Nú er sagan allt önnur og nú er þetta allt miklu flóknara og lengra ferli og þetta getur tekið marga mánuði, upp undir ár að koma sér í gegnum skipulagsferlið sem er auðvitað umhugsunarefni og ég held að það þurfi kannski aðra umræðu um.“
Já, já, einmitt, það hefur nú verið gagnrýnt að þetta sé orðið alltof svifaseint.
„Já, ég tek undir það og ég get tekið undir það vegna þess að ég stend líka í þessum sporum því ég er að byggja mitt eigið hús og er að upplifa á eigin skinni þetta ferli og ég hef auðvitað heyrt það frá okkar viðskiptavinum. Og fjármagnskostnaður er auðvitað margfeldi af tíma og vöxtum og svona á þeim árstíma, árferði sem við búum við í dag þá skiptir tíminn öllu máli og það er töluverð sóun að mínu mati sem liggur þarna í kerfunum hjá okkur.“
Já, já, þú nefnir það að þú sért að byggja þitt eigið hús. Ég las á dögunum að þú varst að útskrifast sem meistari, er það ekki, húsasmíðameistari?
„Jú, það er bara hárrétt hjá þér, það passar.“
Og ertu þá að byggja það sjálfur?
„Það kann bara vel að fara að ég verði meistarinn á mínu eigin húsi og það er svona það sem ég legg upp með.“
Segðu mér nú aðeins hvað varð til, þú ert í þægilegu innidjobbi, ef svo má að orði komast. Hvað verður til þess að maður í þinni stöðu fer í skóla og fer að læra iðn?
„Já, ég skal bara með glöðu geði fara í stuttu máli gegnum þá sögu. Eins og hefur komið fram ólst ég upp í byggingariðnaði alveg frá 14 ára aldri, sem má reyndar ekki í dag, það er of ungt.“
Það er talað um barnaþrælkun, er það ekki?
Það er stundum talað um barnaþrælkun og við unnum bara allan daginn og oft um helgar og fram á kvöld og það var mjög gaman og lærdómsríkt og ég bý yfir þeirri reynslu. Ég hef bara frá þeim tíma haft mikinn áhuga á mannvirkjagerð og byggingum og ég hef verið að fást við verkefni heima við sjálfur og mér finnst gaman að brasa, mér finnst gaman að byggja eitthvað, búa eitthvað til, skapa eitthvað. Það hefur alltaf verið sterk taug í mér og það að læra til húsasmiðs hefur bara fylgt mér lengi, þar til að ég tók ákvörðun um það að skrá mig til náms. Og upphaflega var nú hugmyndin sú að læra bara að vera húsasmiður. Svo var ég hvattur áfram til að fara í sveinspróf, sem ég vil bara segja að sé eitt svona, hvað á maður að segja á íslensku, bara átakamikið próf.“
Það er átakamikið?
„Já, þriggja daga törn. Sem sagt, prófið stóð yfir í þrjá daga og mjög svona reyndi á og mjög öflugt og gott próf. Þannig að ég fór í það og útskrifast með sveinspróf eða sveinsbréf. Svo hugsaði ég mér, jæja, hér er gott að staldra bara við, þetta dugar. Svo fór ég af einhverjum ástæðum að skoða meistaranámið. Af því ég er nú með háskólapróf í viðskiptafræði, þá fékk ég töluvert metið í þessum rekstraráföngum, gæðastjórnun og fjármál og aðra slíka áfanga. Þannig að eftir stóðu þó nokkuð margir áfangar en ekki heilt nám. Þannig að ég fékk hluta metið og fór, sótti þá áfanga sem ég þurfti að sækja í fjarnámi og því lauk núna síðastliðið vor með útskrift.“
Og þú getur með sanni kallað þig húsasmíðameistara.
„Ég get það og er bara mjög stoltur af því vegna þess að þetta nám og iðnnám er ótrúlega gott nám á Íslandi.“
Hægt er að hlusta á hlaðvarpið í heild sinni hér:
Einnig er hægt að hlusta á Spotify.
