Það að taka utan um börn sem þurfa og veita þeim þá þjónustu sem þarf til að þau geti útskrifast út í lífið og orðið nýtir þjóðfélagsþegnar snýst ekki bara um að spara fjármagn í heilbrigðis- og örorkukerfinu síðar. Það snýst líka um að afstýra þeim erfiðleikum og þeirri angist sem getur hlotist af því fyrir börnin og fjölskyldur þeirra að þau bíði eins konar skipbrot í lífinu ung að árum. Guðmundur Ingi Kristinsson, mennta- og barnamálaráðherra, er gestur Ólafs Arnarsonar í hlaðvarpi Eyjunnar. Hann segist þakklátur þeim sem komu honum til varnar og bentu á það sem skiptir máli er hann hlaut gagnrýni fyrir ræðu sem hann flutti á ensku.
Eyjan - Guðmundur Ingi - 5
„Ég er alveg sammála því og ég er þakklátur fyrir þá sem brugðust mér til varnar. Mér finnst það sýna að þjóðin skilur það að fólk geri mistök, að það sé bara mannlegt að gera mistök og við eigum ekki að rífa fólk niður fyrir það. Við verðum að fara að sýna meiri þolinmæði og meiri samúð með hvert öðru þannig að við getum bætt þjóðfélagið. Ég segi fyrir mitt leyti að ég hugsaði ekkert út það eftir þetta hver viðbrögðin yrðu en þegar ég sá þau varð ég innilega þakklátur,“ segir Guðmundur Ingi.
Mér finnst það skipta máli og ég heyri það hér í okkar spjalli að þú ert að gera góða hluti. Þú tekur við góðum hlutum frá Ásthildi Lóu, ríkisstjórnin er sú sama, stefnan er sú sama, og þú tekur þetta kefli og hleypur með það.
„Ég var byrjaður inni í þingi, ég er varaformaður flokksins, ég var þingflokksformaður flokksins og formaður velferðarnefndar, ég hef verið í sjö- ár í velferðarnefnd. Ég hef verið í velferðarnefnd Norðurlandaráðs í sex ár þannig að ég þekki inn á þetta og mennta-, barna- og íþróttamálin, þetta eru ekkert annað en velferðarmál, þannig að ég er bara aðeins til hliðar við þessi venjulegu velferðarmál og ég brenn fyrir þeim.“
Guðmundur Ingi segir grunnáherslu hjá Flokki fólksins að verja börn og núna sé hann kominn í þá aðstöðu að geta virkilega látið til sín taka og hjálpað til við að sjá til þess að ekkert barn verði skilið eftir út undan í menntakerfinu, íþróttum eða eiginlega hvar sem er.
„Við eigum að sjá til þess og við höfum metnað til þess að taka utan um öll börn. Það skiptir okkur svo miklu máli fyrir framtíðina, við verðum að átta okkur á því að eitt barn sem dettur út úr kerfinu vegna þess að það getur ekki lesið eða af einhverjum öðrum orsökum, það getur verið fjölskylduharmleikur sem verður úr því. Oft hefur verið bent á að það þarf kannski að setja eina krónu í eitthvert verkefni en ef þú gerir það ekki getur þurft að borga 20-30 krónur í framtíðinni, eða 20-30 sinnum meira. Eins og ég sagði einhvern tímann þá er eitt barn á bið eftir þjónustu er einu barni of mikið. Ef þú ert með barn sem er sjö ára og ætlar að láta það bíða í tvö ár eftir einhverri þjónustu þá geturðu verið að eyðileggja framtíð þessa barns og hvað þýðir það? Eigum við að taka það inn í heilbrigðiskerfið, eigum við að taka það inn í örorkukerfið? Þetta snýst ekki bara um kostnaði heldur líka þá angist og þá erfiðleika sem viðkomandi barn á eftir að glíma við og jafnvel fjölskylda þess þegar það er orðið eldra.“
Einnig er hægt að hlusta á Spotify.
