Lengi hefur ljóst verið að vegakerfið á Íslandi hefur legið undir skemmdum hin síðari ár og er nú að hruni komið eins og glöggt kom fram í Kastljósi RÚV í gær. Sigurður Ingi Jóhannsson var samgönguráðherra og innviðaráðherra lengst af síðustu sjö árin og þannig hefur vegakerfið dalað og nánast hrunið á vakt hans. Þetta kom skýrt fram í sjónvarpinu í gær.
Orðið á götunni er að ekki hafi verið ofmælt fyrir síðustu kosningar að þá hefði verið við hæfi að Framsókn hefði notað slagorðið HOLAN Í VEGINUM sem sitt einkunnarorð í aðdraganda kosninganna. Sigurður Ingi Jóhannsson, sem er menntaður dýralæknir, réði kollega sinn, dýralækninn Bergþóru Þorkelsdóttur, úr hópi 15 umsækjenda þar sem margir voru verkfræðingar og með menntun og kunnáttu til að sinna starfi vegamálastjóra. En dýralæknirinn varð fyrir valinu.
Nú er komið á daginn að rekstur Vegagerðarinnar og yfirstjórn vegamála á Íslandi brást á síðustu árum, á vakt Sigurðar Inga og þeirra sem hann valdi sér til fulltingis. HOLAN Í VEGINUM eru hin dapurlegu eftirmæli um valdatíð Framsóknar að þessu sinni. Hafa verður þó í huga að hluti af vandanum er vissulega sá að fjárveitingarvaldið hefur ekki beint nægum fjármunum til viðhalds og nýlagningar vega á Íslandi hin síðari ár. Sigurður Ingi hefði vitanlega átt að beita afli sínu meira til að tryggja aukna fjármuni til veganna, en hann var að sönnu einn þriggja oddvita stjórnarflokkanna síðustu sjö árin og varla þarf að ætla að hinir formennirnir hafi ekki skilið að hrun vegakerfisins var yfirvofandi.
Orðið á götunni er að til þess að ráða bót á ástandinu þurfi að bregðast hratt við. Tryggja þarf viðbótarfjárveitingar í vegakerfi landsins. Það verður ekki gert á þessu ári úr þessu nema með því að leggja á stóraukin þungagjöld á þungaflutninga sem eru að sliga vegakerfið. Þungaflutningar hafa margfaldast á liðnum árum án þess að stjórnvöld hafi brugðist við. Bæði Eimskip og Samskip gera út öflugan flota bifreiða sem aka fullhlaðnir um landið alla daga ársins með jafnvel allt að 40 tonn í einu. Vegirnir sligast undan þessu. Fleiri aðilar sinna þessum flutningum af myndarskap, eins og t.d. Flutningalausnir á Sauðárkróki sem eiga og gera út 80 ökutæki í þessum tilgangi. Þessi starfsemi er mikilvæg fyrir atvinnulífið í landinu en innviðirnir verða að þola álagið. Og því er óhjákvæmilegt að notendur greiði fyrir aðganginn. Þeir greiði sem nota. Upp á það hefur vantað á undanförnum árum.
Fjárveitingavaldið í landinu verður að bregðast við og taka verður til hendi varðandi yfirstjórn vegamála á Íslandi. Nú dugar ekkert minna en fagmennska og stjórn þeirra hæfustu.
Ný ríkisstjórn þarf að sýna festu og fagmennsku á þessu sviði, eins og á mörgum öðrum, og bæta hratt fyrir slóðaskap Framsóknarforystunnar síðustu sjö árin. Þjóðinni var valin ný forysta í nóvember síðastliðnum til að koma á umbótum víða um þjóðfélagið, meðal annars í samgöngumálum þar sem sleifarlag hefur ríkt.
