Ákvörðun Þórdísar kemur sumum á óvart enda hafði hún fengið talsverða hvatningu til að fara í framboð. Enn er alls óvíst hver verður næsti formaður flokksins en meðal þeirra sem nefndir hafa verið við framboð eru til dæmis Áslaug Arna Sigurbjörnsdóttir, Guðlaugur Þór Þórðarson og Guðrún Hafsteinsdóttir. Þá sagðist Diljá Mist Einarsdóttir liggja undir feldi í samtali við Morgunblaðið í dag.
Sjá einnig: Þórdís Kolbrún ekki í framboði til formanns
Fjölmargir hafa sent Þórdísi góðar kveðjur undir færslu hennar á Facebook og þá hefur Björn Leví Gunnarsson, fyrrverandi þingmaður Pírata, lýst yfir ákveðnum vonbrigðum. Virðist Þórdís hafa verið í nokkru uppáhaldi hjá þingmanninum fyrrverandi.
Björn Leví segir:
„Djö.
Jæja, þá get ég kannski sagt þetta bara beint út án þess að það hafi áhrif á framboð hennar. Ég held að Sjálfstæðisflokkurinn yrði betri stjórnmálaflokkur undir forystu Þórdísar Kolbrúnar. Ég þekki hana bara af heiðarleika og hreinskilni. Einn af fáum fjármálaráðherrum sem mættu fyrir fjárlaganefnd til þess að svara fyrir mál sín (það er að vísu ekki alveg rétt þegar ég hugsa um það, allir nema Bjarni mættu).
Ég hef auðvitað ekki hugmynd um hvernig þessir jákvæðu eiginleikar myndu halda sér í forystuhlutverki – en að mínu mati hefði það verið líklegast.
Kannski næst.“
Á Facebook-síðu Þórdísar senda bæði núverandi og fyrrverandi samherjar og mótherjar henni kveðjur. „Gangi þér allt að sólu,“ segir Ingibjörg Sólrún Gísladóttir, fyrrverandi formaður Samfylkingarinnar og fyrrverandi ráðherra.
„Hjartans þakkir fyrir þitt framlag hingað til. Hlakka til samstarfsins. Gangi þér sem allra best,“ segir Rósa Guðbjartsdóttir, þingmaður Sjálfstæðisflokksins og fyrrverandi bæjarstjóri í Hafnarfirði. „Takk fyrir allt kæra Þórdís og gangi þér alltaf sem allra best,“ segir Sigurður Kári Kristjánsson, lögmaður og fyrrverandi þingmaður Sjálfstæðisflokksins.
Páll Valur Björnsson, fyrrverandi þingmaður Bjartrar framtíðar, segir undir færslu Þórdísar að þetta séu góðar fréttir fyrir andstæðinga Sjálfstæðisflokksins.
„Einfaldlega vegna þess að þú ert alger yfirburðarmanneskja í flokknum. Þú og aðeins þú hefur hæfileika og getu til þess að breyta flokknum í það sem þú talar um í þessum fallega og einlæga pistli. Gangi þér allt að sólu kæra Þórdís. Þú mátt vera aldeilis stolt af þínum störfum fyrir land og þjóð þó mörgum samflokksmönnum þínum finnist það ekki.“
Björn Birgisson, Grindvíkingur og samfélagsrýnir, segir á Facebook-síðu sinni að þetta séu ekkert endilega óvænt tíðindi.
„Eftir brotthvarf Bjarna hefur hún áttað sig á hinum djúpstæða ágreiningi innan flokksins á milli hinnar eitruðu frjálshyggju og hófsamari hægri manna, ágreiningi sem útilokar að formaðurinn sé hafinn yfir gagnrýni innan flokksins eins og þar er siður. Þessi ákvörðun hennar er líklega rökrétt miðað við aðstæður,“ segir hann meðal annars.
