Leiðtogar ríkisstjórnarinnar hafa rætt um að veitt verði fjármagni til að efla umræðu um kosti og galla aðildar Íslands að Evrópusambandinu. Ríkisstjórnin sem slík mun ekki taka afstöðu til þess hvort Ísland eigi að halda áfram aðildarviðræðum við Evrópusambandið en búast má við því að einstakir stjórnarliðar geri sig gildandi í umræðunni. Kristrún Frostadóttir segir mögulega aðild Íslands að ESB snúast um miklu fleira en gjaldmiðilinn en úttekt á kostum og göllum krónunnar sé vissulega innlegg í umræðuna. Kristrún er gestur Ólafs Arnarsonar í hlaðvarpi Eyjunnar.

Hér má hlusta að brot úr þættinum:

Eyjan - kristrun Frosta 3

„Þetta snýst einmitt ekki bara um gjaldmiðilinn. Þetta snýst um hverju við viljum tilheyra pólitískt, menningarlega, fjármálalega, og það eru mjög margar spurningar þarna undir. Það væri mjög jákvætt fyrir umræðuna um Evrópusambandið ef hún snerist um meira en gjaldmiðilinn. Hún gerir það oft um gjaldmiðilinn og ég skil það, hef fullan skilning á því, en ég held að það myndi styrkja hana einmitt ef við myndum ná að nálgast hana frá breiðari grunni. En þarna erum við klárlega að ýta undir ákveðna stoð í umræðunni og sjá hvar við lendum með það, við vitum ekkert hvernig niðurstaðan verður af því. Síðan gefst þá svigrúm til þess að ræða aðra þætti Evrópusambandsins sem snúa að alþjóðaviðskiptum, sem snúa að vörnum landsins, sem snúa að auðlindamálum og ég er í engum vafa um að margt mun kom a upp. Það eru þarna sjóðir og mál sem snúa að landbúnaði. Það er margt mjög áhugavert sem snýr að Evrópusambandinu þannig að það er hægt að halda marga mjög áhugaverða fundi og málstofur um þetta næstu tvö til þrjú árin,“ segir Kristrún.

Mun ríkisstjórnin sem slík beita sér fyrir málstofum og öðru slíku um Evrópusambandið á breiðum grunni?

„Ríkisstjórnin mun ekki taka afstöðu til þess hver niðurstaða þessarar atkvæðagreiðslu á að vera. Hún mun ekki í heild sinni gera það. Því er raunverulega stillt þannig upp að þetta sé bara atkvæðagreiðsla fyrir þjóðina og ríkisstjórnin þarf bara að lúta niðurstöðu hennar. en það er vissulega þannig að það verða einhverjir aðilar innan einhverra flokka sem vilja ljá þessu málefni einhverja vigt í aðra hvora áttina og þeim er frjálst að gera það, ekkert óeðlilegt við það. Við höfum ekki ákveðið svona formlega skipulag umræðna með aðkomu ríkisstjórnarinnar en ríkisstjórnin mun sjálf ekki beita sér fyrir já eða nei.“

Kristrún segir að það hafi verið rætt milli leiðtoga ríkisstjórnarinnar að veita fjármagni í skipulag viðburða hjá grasrótarfélögum sem myndu vilja tala fyrir öðrum hvorum málstaðnum. „Ég held að það gæti skipt máli, að það sé eitthvað fjárhagslegt svigrúm til þess að ýta undir jákvæða umræðu í báðar áttir þó að ríkisstjórnin taki ekki beint þátt í því.“

Hægt er að hlusta á hlaðvarpið í heild sinni hér: