Katrín Jakobsdóttir, fyrrverandi forsætisráðherra, er nýr formaður stjórnar Fasteigna Háskóla Íslands en skipanin var samþykkt á síðasta fundi Háskólaráðs. Hún tekur við af Daða Má Kristóferssyni sem hefur tekið við embætti sem efnahags- og fjármálaráðherra.

Greint er frá tíðindunum á vef Háskóla Íslands og þar er haft eftir Katrínu:

„Mér er sýnt mikið traust með þessu verkefni en Fasteignir HÍ er félag í mótun sem hefur gríðarlega mikilvægu hlutverki að gegna við framtíðaruppbyggingu á háskólasvæðinu. Ég hlakka til að takast á við þetta nýja verkefni.“

Jón Atli Benediktsson, rektor Háskóla Íslands, þakkar Katrínu fyrir að hafa tekið verkefnið að sér á Facebook-síðu rektors.

Auk Katrínar sitja Guðmundur R. Jónsson, Hrafn Hlynsson, Íris Huld Christersdóttir og Silja Bára Ómarsdóttir í stjórn félagsins.

Fasteignir Háskóla Íslands voru sett á laggirnar árið 2021. Hlutverk félagsins er að leigja aðstöðu undir starfsemi Háskóla Íslands, svo sem kennslu, vísindarannsóknir og nýsköpun ásamt ráðstefnum og þess háttar viðburðum. Fasteignir Háskóla Íslands telja nokkra tugi og eru samanlagt um 100 þúsund fermetrar að stærð.