fbpx
Föstudagur 04.apríl 2025
EyjanFastir pennar

Þorsteinn Pálsson skrifar: Heil eilífð

Eyjan
Fimmtudaginn 3. apríl 2025 06:00

Ekki missa af Helstu tíðindum dagsins í pósthólfið þitt

Lesa nánar

Í stjórnarsáttmála ríkisstjórnarinnar segir að þjóðaratkvæðagreiðsla um framhald viðræðna um aðild Íslands að Evrópusambandinu fari fram eigi síðar en árið 2027.

Það var sannarlega kominn tími til að gefa þjóðinni tækifæri til að rjúfa kyrrstöðuna.

Í desember fannst mér hyggilegt að gefa drjúgan tíma til kosningabaráttunnar vegna þess að reynslan annarra landa sýnir að talsmenn óbreytts ástands hafa alla jafnan nokkurt forskot í þjóðaratkvæðagreiðslum.

En í ljósi gjörbreyttra aðstæðna er spurning hvort ábyrg ríkisstjórn getur leyft sér að láta átökin um þessa ákvörðun standa í langan tíma.

Úr báðum áttum

Ný ríkisstjórn Bandaríkjanna hefur hreinlega snúið heimsmyndinni á hvolf. Staða Norðurlanda eins og annarra Evrópuþjóða gagnvart Bandaríkjunum er nú miklu meiri óvissu háð en í desember svo ekki sé dýpra í árinni tekið.

Þórdís Kolbrún Reykfjörð Gylfadóttir sagði aðspurð á fundi Alþjóðamálastofnunar á dögunum að í ljósi alls þess, sem gerst hefði í heiminum síðan í janúar, væri heil eilífð til ársins 2027.

Þá hefur Dagur B. Eggertsson þingmaður Samfylkingarinnar sett fram vel rökstudd sjónarmið um að óráðlegt sé að verja svo löngum tíma í kosningabaráttuna eins og málum er komið.

Sjónarmið af þessu tagi hafa þannig komið frá áhrifafólki úr flokkum, sem bæði hafa verið með og á móti Evrópusambandsaðild.

Stóra prófið

Augljóst er að Ísland verður að tryggja pólitíska stöðu sína í alþjóðasamfélaginu betur rétt eins og önnur Norðurlönd og aðrar Evrópuþjóðir.

Löng kosningabarátta gat verið heppileg eins og mál blöstu við í desember.

Nú er staðan hins vegar sú að bregðast verður hraðar við en áður var talið nauðsynlegt.

Óvissu um vegferð Íslands þarf að eyða sem fyrst. Það er ekki aðeins brýnt fyrir hagsmuni fólksins í landinu heldur einnig ríkisstjórn, sem stendur fyrir pólitíska festu og stöðugleika.

Stóra próf allra ríkisstjórna er hvernig þær bregðast við nýjum aðstæðum og breyttum forsendum.

Eining

Áður en þau miklu umskipti urðu í byrjun þessa árs, sem kalla á hraða aðlögun að nýjum aðstæðum, heyrðust stundum þau rök að ekki ætti að taka aðildarmálið á dagskrá af því að það sundraði þjóðinni.

Þegar búið er að taka ákvörðun um þjóðaratkvæði á þetta sjónarmið ekki við lengur. Það er ágreiningur. Hann verður til staðar þangað til þjóðin fær tækifæri til þess að taka af skarið.

Það var ágreiningur um inngönguna í NATO, líka um aðildina að EFTA og ekki síður um EES. Eftir á varð hins vegar víðtæk samstaða um þessar ákvarðanir. Fáir efast um gildi þeirra í dag. Í reynd hafa þær eflt einingu þjóðarinnar.

En það sem mestu máli skiptir er að Ísland taki virkan þátt í að styrkja einingu Norðurlanda og annarra Evrópuþjóða, sem ætla að standa vörð um fullveldi þjóða, frjáls viðskipti og mannréttindi nú þegar vegið er að undirstöðum þeirra alþjóðastofnana sem tryggt hafa fullveldi, frið og frelsi í áratugi.

Ólýðræðisleg staða

Það var ágreiningur um aðildarumsóknina á sínum tíma. Þegar ákveðið var að stinga umsókninni ofan í skúffu urðu enn meiri deilur.

Hvort tveggja sýnir að það er lýðræðisleg nauðsyn að gefa þjóðinni kost á að afgreiða málið.

Sextán árum eftir að umsóknin var lögð fram er staðan sú að þeir sem vilja óbreytt ástand ráða för. Enginn veit þó með vissu hvort þeir eru í meirihluta eða minnihluta. Úr því fæst ekki skorið nema með þjóðaratkvæði.

Á þessu ári

Mín niðurstaða er sú að hyggilegt sé að gefa eftir það taktíska sjónarmið að aðildarsinnar fái lengri tíma til að vega upp á móti því forskoti sem óbreytt ástand hefur oftast í þjóðaratkvæðagreiðslum.

Það eru einfaldlega ríkari heildarhagsmunir að láta ákvörðunina ekki hanga mikið lengur í lausu lofti. Segi þjóðin nei þarf að hugsa önnur ráð skjótt. Enginn hefur þó kynnt annan raunhæfan kost í stöðunni.

Trúlega er best að þjóðaratkvæðið verði á síðasta fjórðungi þessa árs eða á fyrsta fjórðungi næsta árs.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Pennar

Mest lesið

Nýlegt

EyjanFastir pennar
Fyrir 2 vikum

Svarthöfði skrifar: Flokksgæðingar fallinna flokka maka krókinn á Grindavík

Svarthöfði skrifar: Flokksgæðingar fallinna flokka maka krókinn á Grindavík
EyjanFastir pennar
Fyrir 2 vikum

Davíð Þór Björgvinsson skrifar: Ísland, NATO og varnarsamningurinn

Davíð Þór Björgvinsson skrifar: Ísland, NATO og varnarsamningurinn
EyjanFastir pennar
Fyrir 2 vikum

Ágúst Borgþór skrifar: Skjól fyrir þolendur eða eltihrella?

Ágúst Borgþór skrifar: Skjól fyrir þolendur eða eltihrella?
EyjanFastir pennar
Fyrir 2 vikum

Sigmundur Ernir skrifar: Nú drepa þeir tvo fyrir einn

Sigmundur Ernir skrifar: Nú drepa þeir tvo fyrir einn
EyjanFastir pennar
Fyrir 2 vikum

Óttar Guðmundsson skrifar: Herra langveikur

Óttar Guðmundsson skrifar: Herra langveikur
EyjanFastir pennar
Fyrir 3 vikum

Óttar Guðmundsson skrifar: Göngugrindahlaup

Óttar Guðmundsson skrifar: Göngugrindahlaup
EyjanFastir pennar
Fyrir 3 vikum

Þorsteinn Pálsson skrifar: Um hvað snýst bandalag?

Þorsteinn Pálsson skrifar: Um hvað snýst bandalag?
EyjanFastir pennar
28.02.2025

Steinunn Ólína skrifar: Ayahuasca og andleg reynsla á Landspítalanum

Steinunn Ólína skrifar: Ayahuasca og andleg reynsla á Landspítalanum
EyjanFastir pennar
27.02.2025

Svarthöfði skrifar: Gamla Sovétið leggur hægrinu lið

Svarthöfði skrifar: Gamla Sovétið leggur hægrinu lið