Á ferðum mínum um landið sem leiðsögumaður ber margt á góma í samtölum við ferðamennina.
Þeir dásama náttúruna, fjöllin og fossana. Einnig jarðhitann, hreina vatnið og fuglalífið.
Jarðsagan, eldvirknin í landinu og landnámið vekur hrifningu þeirra. Margir spyrja hvernig það gat gerst að um 400 landnámsmenn á jafnmörgum skipum lögðu á sig allt að sjö daga siglingu yfir hafið á opnum skipum til að nema landið.
Þeim finnst athyglisvert að eftir landnám hafi verið friður í landinu í um 350 ár og að því hafi verið stýrt af bændum sem þjóðveldi þar sem engir kóngar komu við sögu.
Friðsamleg stofnun Alþingis og kristnitakan vekur undrun og Íslendingasögurnar eru endalaus uppspretta umræðu. Flestir hafa áhuga á að heyra tungumálið talað og vilja vita um uppruna þess.
Það sem vekur hvað mesta undrun ferðamanna er fámennið á Íslandi og hverju þessir fáu íbúar geta áorkað. Við Íslendingar erum álíka fjölmennir og íbúar Cleveland í BNA, Bochum í Þýskalandi, Malmö í Svíþjóð og Árósa í Danmörku svo dæmi séu nefnd.
Samt höfum við á stuttum tíma náð að verða ein af 10 ríkustu þjóðum heims mælt í þjóðarframleiðslu á mann. Við höfum byggt upp velferðarkerfi, lífsgæði og atvinnuvegi sem eru framarlega á sínum sviðum í heiminum þrátt fyrir að við þurfum að glíma við eldgos og jarðskjálfta sem orsakast af því að landið er á mörkum tveggja jarðskorpufleka sem færast í sundur um 2 metra á hundrað árum.
Þeir furða sig á því að þrátt fyrir fámennið þá höldum við uppi þingi með 63 þingmönnum og stjórnarráði með um þúsund starfsmönnum. Þessi litla þjóð er með um 30 sendiráð og sendiskrifstofur um allan heim og alþjóðaflugvöll sem annast um 8 milljónir farþega á ári. Auk þess erum við með 8 háskóla og 85 tónlistarskóla.
Ofangreind atriði vekja hvað mesta furðu þeirra ferðamanna sem ég ræði við. Þeir trúa því varla að aðeins um 390 þúsund íbúar geti áorkað þessu.
En það er meira sem þeir eru hissa á. Meðal annars að við skulum vera með um 175 sundlaugar sem eru flestar hitaðar upp með jarðvarma. Í landinu okkar eru um 75 golfvellir og um 6% þjóðarinnar leikur golf sem er líklega heimsmet. Svo sigrum við stórþjóðir í knattspyrnu og stundum í handbolta!
Um 99% af orkunni sem við framleiðum er endurnýjanleg sem er eitt hæsta hlutfall í heiminum þar sem meðaltalið er um 11%. Á Íslandi eru um 50 stórar vatnsaflsvirkjanir og um 10 stórar jarðvarmavirkjanir. Hvað skyldu þær vera margar í Bochum eða Malmö?
Við framleiðum langmest rafmagn á mann í heiminum og veiðum um 2% af öllum villtum fiski í heiminum. Við framleiðum mest af áli á mann í heiminum eða um 2 tonn á mann á ári. Álframleiðsla okkar nemur um 1% af heimsframleiðslunni í þremur stórum álverum.
Það eru margar skýringar á þessari velgengni landsins. Meðal annars sú að Ísland býr yfir náttúruauðlindum sem okkur hefur tekist að nýta vel.
Það er hollt að rifja það upp að flest framfaraskeið landsins okkar tengjast viðskiptafrelsi, frjálsum milliríkjaviðskiptum, stöðugum gjaldmiðli, opnu hagkerfi og tollfrelsi.
Fyrsta hagvaxtarskeiðið var á árunum 1876 til 1914 þegar Ísland var í norræna myntbandalaginu og krónan tengd verði á gulli. Hún var skiptanleg í allri Norður Evrópu.
Næsta blómaskeiðið var þegar Viðreisnarstjórnin var við völd á árunum 1959 til 1971. Þá opnaðist hagkerfið, verslunarfrelsi var stóraukið, stóriðjan hóf innreið sína og í framhaldinu gekk Ísland í EFTA – fríverslunarsamtök Evrópu.
Velgengni okkar jókst til muna þegar Ísland gerðist aukaaðili að ESB gegnum EES – Evrópska efnahagssvæðið – árið 1994.
Þannig er ljóst að hagvöxtur og velferðin á Íslandi byggist fyrst og fremst á frjálsum milliríkjaviðskiptum sem við höfum tryggt með aðild að alþjóðasamtökum.
Mikilvægasta verkefni okkar á næstu árum er að tryggja fulla aðild Íslands að Evrópusambandinu. Með fullri aðild aukum við áhrif okkar á allar ákvarðanir á sviði ESB og getum fljótlega tekið upp evruna, alþjóðlegan gjaldmiðil sem leiðir til lækkunar vaxta og lægri verðbólgu. Verðtrygging fjárskuldbindinga verður úr sögunni með upptöku evru og skiptikostnaður gjaldeyris minnkar.
Með fullri aðild að ESB eykst velferð, samkeppni og stöðugleiki á Íslandi. Við verðum virkari í alþjóðastarfi og stóraukum tækifæri og möguleika íslenskra fyrirtækja og einstaklinga til að eflast og þróast á alþjóðasviðinu.
