Áslaug Arna Sigurbjörnsdóttir, ráðherra vísinda, iðnaðar og nýsköpunar, sagði á dögunum í viðtali að henni hugnaðist vel stjórnarsamstarf Sjálfstæðisflokks, Viðreisnar og Miðflokksins. Hún bætti því síðan við að hægri menn ættu að sameinast undir merkjum sjálfstæðisstefnunnar í Sjálfstæðisflokknum.

Miðflokksmaðurinn Davíð Bergmann tekur ekki undir þetta í aðsendri grein á Vísir.is í dag. Davíð segir í grein sinni:

„Það er ekki sjálfgefið að menn og konur komi aftur í stjórnmálaflokk sem hefur svikið kjósendur sína ítrekað og gefið endalausan afslátt af stefnu sinni, ekki frekar en konan sem er í Kvennaathvarfinu, snúi aftur til ofbeldismannsins sem hefur lofað öllu fínu og fögru ef hún kemur aftur heim. Flokkur sem segist standa með stétt við stétt getur ekki verið samansettur af níu lögmönnum í sjötján manna þingflokki, þannig stjórnmálaflokkur hefur misst jarðtenginguna við kjósendur sína. Í þeim flokki heyrast ekki allar raddir og sá flokkur er hættur að endurspegla samsetningu samfélagsins sem við lifum í dag.

Við sem kjósum til hægri getum ekki sameinast undir þeirri stefnu sem Sjálfstæðisflokkurinn er að taka í dag. Það sýna verk ríkisstjórnarinnar undir forystu Sjálfstæðisflokksins að undanförnu, það hefur sýnt sig að þeim flokki er ekki treystandi lengur. Það að kalla eftir því að Sjálfstæðisflokkurinn leiði hægrimenn undir sjálfstæðisstefnunni er eins og að stíga aftur inn í ofbeldissamband með glóðarauga á báðum augum.“

Davíð segir að samsetning þingflokks Sjálfstæðisflokksins sé einhæf, þar sé ekki þverfótandi fyrir lögfræðingum. Flokkurinn skarti þó slagorðinu Stétt með stétt. Hann hafi hins vegar misst jarðsamband við kjósendur sína. Davíð segir síðan:

„Þess vegna er gott að hafa fundið sér nýtt heimili þar sem maður veit að það ríkir staðfesta og öryggi og menn eru ekki að gefa afslátt af stefnu sinni eftir því hvernig veður og vindar blása. Miðflokkurinn er ekki svartfuglavilltur í sjólægðinni, hann er flokkur sem hefur fast land undir fótum sér og ætlar að leiða íslenska þjóð til farsældar í framtíðinni og þar vil ég tilheyra.“