Kamala Harris og Donald Trump mættust í kappræðum í beinni sjónvarpsútsendingu í nótt. Þetta var í fyrsta sinn sem þau mættust í kappræðum og var þeirra beðið með mikilli eftirvæntingu. Almennt séð virðast fréttaskýrendur á því máli að Harris hafi staðið sig mun betur og sumir ganga svo langt að segja að hún hafi valtað yfir Trump.

Chris Wallace, fréttamaður CNN, ræddi við Jake Tapper, sem stýrði kappræðum Trump og Biden í júní en þær enduðu hörmulega fyrir Biden eins og flestir muna eflaust. Wallace var ekkert að skafa utan af hlutunum og sagði: „Jake, ég hélt ekki að ég myndi nokkru sinni sjá kappræður sem voru jafn skelfilegar, eins og þær sem þú og Dana stýrðuð í júní, þegar Joe Biden gerði í raun og veru út af við kosningabaráttu sína. Ég held að kvöldið í kvöld hafi verið jafn slæmt en núna fyrir Trump.“

Trump er sjálfur á öðru máli og þegar hann ræddi við fréttamenn að kappræðunum loknum sagði hann meðal annars: „Ég held að þetta séu bestu kappræður mínar í sögunni. Mjög mikilvægar kappræður. Þetta var áhugavert og sýndi hversu veik staða þeirra er, hversu brjóstumkennanleg þau eru,“ sagði hann.

Hann sakaði stjórnendur kappræðnanna um að hafa verið í liði með Kamala og að hann hafi verið einn á móti þremur á sviðinu.

Fréttamaður dönsku TV2 sjónvarpsstöðvarinnar náði tali af Trump skömmu eftir að kappræðunum lauk og spurði hann hvað honum fyndist um kappræðurnar: „Ég tel þetta hafa verið góðar kappræður. Ég hef tekið þátt í mörgum góðum kappræðum og finnst þetta hafa verið besta frammistaða mín,“ svaraði forsetinn fyrrverandi.

Mirco Reimer-Elster, sem er sérfræðingur í bandarískum málefnum, sagði í samtali við TV2 að Harris hafi staðið sig miklu betur en Trump: „Hún veitti honum ekki bara harða samkeppni, hún valtaði yfir hann.“ Hann sagði engan vafa leika á að Harris sé sigurvegari kappræðnanna.