Nágrannar J.D. Vance, varaforsetaefnis Donald Trump í forsetakosningunum í Bandaríkjunum sem fram fara í nóvember, eru sagðir óánægðir vegna öryggisráðstafanna sem gerðar hafa verið í nágrenni heimilis hans. Felast þær einkum í því að vinsælum almenningsgarði hefur verið lokað.

J.D. Vance er öldungardeildarþingmaður fyrir heimaríki sitt Ohio en heldur eins og margir sitjandi þingmenn á Bandaríkjaþingi heimili í nágrenni höfuðborgar landsins, Washington D.C. Býr hann ásamt fjölskyldu sinni í borginni Alexandria í Virginíu-ríki en í nágrenni heimilsins er almenningsgarður, sem íbúar í nágrenninu hafa mikið nýtt sér, sem var lokað í gær og það átti einnig við um næstu húsaröð við garðinn en um hana mega aðeins íbúar í viðkomandi húsum fara.

Borgaryfirvöld lokuðu garðinum að beiðni Öryggisþjónustunnar (e. Secret Service) sem hefur það hlutverk að gæta öryggis meðal annars forseta og varaforseta Bandaríkjanna sem og öryggis þeirra sem bjóða sig fram til þessara embætta.

Íhaldsmaður umkringdur frjálslyndi

Lokun garðsins hefur valdið mikilli ónægju meðal íbúa í nágrenninu og víðar í borginni. Á samfélagsmiðlum hafa birst ummæli þar sem meðal annars Vance er hvattur til að flytja eitthvert annað fyrst að garðurinn feli í sér svona mikla hættu fyrir hann. Sagði sami aðili að sannur repúblikani, sem er sá stjórnmálaflokkur sem Vance og Trump tilheyra, myndi aldrei samþykkja að yfirvöld tröðkuðu með þessum hætti á réttindum annarra.

Annar aðili sem tjáði sig um málið á samfélagsmiðlum sagði garðinn tilheyra íbúum Alexandria og að íbúar ættu að geta haft óskertan aðgang að honum sama hver búi í næsta nágrenni.

Einn sem tjáir sig um málið kemur Vance til varnar og segir að íbúar borgarinnar eigi að vera stoltir af því að einn af þeim sé að bjóða sig fram til embættis varaforseta.

Bent hefur verið á að garðurinn er nefndur eftir konu að nafni Judy Love sem var frjálslyndur demókrati og beitti sér í þágu málefna sem hinn íhaldssami Vance er í algjörri andstöðu við. Einn aðili sem tjáir sig um málið segir undarlegt að stjórnmálamaður eins og Vance hafi flutt í hverfi sem sé fullt af fóki sem sé mun hrifnara af frjálslyndi en hann.

Það var The Daily Beast sem greindi frá.