Flugfélagið Play hefur hafið miðasölu á áætlunarferðum til Álaborgar í Danmörku. Fyrsta flugið til Álaborgar verður 7. júní 2025 en flogið verður alla þriðjudaga og laugardaga fram að 26. ágúst.
Álaborg er sjarmerandi borg í norðurhluta Jótlands. Hún er fjórða stærsta borg Danmerkur og mjög vinsæll ferðamannastaður vegna sögu sinnar, fallegra garða og spennandi menningarlífs.
Álaborg er þriðji áfangastaður Play í Danmörku en fyrir flýgur Play til Kaupmannahafnar allan ársins hring og til Billund yfir sumarmánuðina. Allir þessir staðir í Danmörku falla vel að tengiflugsleiðakerfi Play til áfangastaða í Norður-Ameríku, þar á meðal Boston, New York, Washington DC, Baltimore og Toronto.
Play flýgur til hátt í fjörutíu áfangastaða en auk áfangastaða í Norður-Ameríku flýgur félagið til vinsælustu borga Evrópu og er með glæsilega sólarlandaáætlun um sunnanverða álfuna.
Hjá Play starfa um 500 manns en floti félagsins telur 10 farþegaþotur úr Airbus A320 fjölskyldunni.
„Við erum virkilega ánægð að fjölga áfangastöðum okkar í Danmörku og geta þannig boðið þeim fjölda Íslendinga sem þar býr upp á hagkvæman kost til að komast til Íslands að heimsækja fjölskyldu og vini. Tengiflugið okkar til Norður-Ameríku mun einnig verða góð viðbót fyrir íbúa Álaborgar. Þetta eru því góðar fréttir fyrir þann stóra hóp fólks sem býr í vesturhluta Danmerkur og að sjálfsögðu Íslendinga sem vilja komast þangað í frí,” segir Einar Örn Ólafsson, forstjóri Play.