Guðrún Hafsteinsdóttir dómsmálaráðherra og fyrsti þingmaður Sjálfstæðisflokksins í Suðurkjördæmi er gestur Einar Bárðarsonar í nýjasta þættinum hans af Einmitt. Þau ræða þar nokkur af þeim málum sem mótað hafa umræðuna síðustu misseri eins og ný útlendingalög, óreiðuna sem ríkir í sölumálum á áfengi og flótta kjósenda frá Sjálfstæðisflokknum síðustu 15 ár.
Einar og Guðrún ræða um námsár Guðrúnar og talið berst að skólagöngu þeirra systkina en Aldís eldri systir Guðrúnar sem um árabil var bæjarstjóri i Hveragerði og Hafsteinn bróðir hennar fóru norður til Akureyrar í menntaskóla. Það var í raun algjör tilviljun sem réð því en þegar kom að Guðrúnu að velja framhaldsskóla þá sagði móðir hennar að hún væri búin að missa of mörg börn norður á Akureyri og úr varð að Guðrún var ár í Verslunarskólanum og síðan fór hún í Fjölbrautaskóla Suðurlands.
„Þetta er viðkvæmur málaflokkur og ég hef eftir mesta mætti stigið inn í hann af virðingu en festu,“ segir Guðrún þegar talið berst að málefnum erlendra hælisleitenda og nýjum útlendingalögum. Einar spyr hvernig gagnrýnin á flokkinn og hana hafi farið í hana. Guðrún fer yfir vöxt um umsóknir til alþjóðlegrar verndar sem fjölgað hefur í veldisvexti síðustu ár. Samfélagið ráði ekki við umfangið og kostnaðinn sem því fylgi.
„Vitaskuld er það erfitt þegar við þurfum að vísa frá fólki. En þá er það byggt á ákvörðun byggðri á okkar lögum og á tveimur dómstigum og þá ber viðkomandi að yfirgefa landið,” segir Guðrún og bætir við: „Ég hef lagt áherslu á að það eru lög í þessu landi og það þurfa allir að fara eftir þeim lögum hvort sem að þú ert Íslendingur eða útlendingur.”
Þegar umræðan berst að gengi Sjálfstæðisflokksins segir Guðrún að niðurstöður skoðanakannanna séu óásættanlegar og flokkurinn verði að gera betur. Hún segir flokkinn ekki nógu duglegan að tala fyrir sinni stefnu og leyfi andstæðingum hans að skilgreina flokkinn en fulltrúar flokksins þurfi að stíga fastar inn þar. Gengi flokksins í könnunum sé óásættanlegt og því verði að snúa við. Hún nefnir það mýmargt máli sínu til stuðnings. Eitt af því sé það að flokkurinn sé skilgreindur sem karlrembuflokkur þegar þær fullyrðingar standist enga skoðun að hennar mati.
Guðrún segist oft vera spurð að því hvað hún sé að gera í þessum karlrembuflokki og segist ekki skilja það hvernig fólk fái það út að Sjálfstæðisflokkurinn sé karlrembuflokkur .
„Þetta er bara alrangt. Stærstu jafnréttisskref sem stigin hafa verið í íslensku samfélagi hafa verið gerð á vakt sjálfstæðismanna”.
Guðrún heldur áfram á þessum nótum. „Bjarni Benediktsson hefur verið óhræddur að lyfta upp konum til æðstu metorða og ég er ein af þeim. Núna eru fimm ráðherrar og þar eru þrjár konur og tveir karlar, og í sömu ríkisstjórn er jafnt kynjahlutfall.” Þannig vísar hún fullyrðingum um karlrembu til föðurhúsanna.
Hægt er að hlusta á samtalið í heild sinni hér.
