Arnar Þór Jónsson, lögmaður og forsetaframbjóðandi, liggur nú undir feld varðandi stofnun á nýjum stjórnmálaflokk. Þetta kemur fram í umfjöllun RÚV en í henni kemur fram að fréttastofan hafi haft spurnir af fundarhöldum ónægðra íhalds- og sjálfstæðismanna sem finni sér ekki sess meðal þeirra núverandi stjórnmálaflokka.
Í nýafstöðnum forsetakosningum hlaut Arnar Þór 5,08% fylgi og varð í sjötta sæti af þeim sem buðu sig fram. Athygli vakti þó í kosningabaráttunni að dyggur hópur virtist styðja Arnar Þór sem lét vel í sér heyra á samfélagsmiðlum og athugasemdakerfum fjölmiðla. Þá voru margir á því að Arnar Þór myndi mögulega koma til greina sem oddviti Miðflokksins í Suðvesturkjördæmi fyrir komandi alþingiskosningar en hugur hans stefnir mögulega ekki á þær slóðir.
Segir Arnar Þór, sem um tíma var varaþingmaður Sjálfstæðisflokksins, í samtali við RÚV að fjölmargir hafi komið að máli við sig og hvatt sig til að stofna nýjan stjórnmálaflokk. Undirbúningsvinna hafi þegar farið af stað og í raun ætti Arnar Þór nú aðeins eftir að ákveða hvort hann myndi hrökkva eða stökkva.
Ákvörðun eigi að liggja fyrir um miðjan ágústmánuð en þá muni hann snúa heim úr sumarfríi.
