Hluti þjóðarinnar er vel yfir kjörþyngd að mati sérfræðinga. Með aukinni líkamsþyngd hefur framboðið af alls konar megrunarkúrum aukist. Markþjálfar, næringarráðgjafar og læknar prédika fyrir fólki að borða og hreyfa sig rétt til að létta sig. Árangurinn hefur þó ekki verið góður til langframa. Vel heppnaður megrunarkúr endar venjulega á byrjunarreit eftir einhverja mánuði. Lífið einkennist af endurteknum megrunum sem fara í hring eftir hring.

Á síðustu tímum hefur framboð aukist af nýjum og róttækari ráðum. Fjöldi fólks fer í magaermi eða aðrar varanlegar breytingar á meltingarvegi. Mikil sókn er í sykursýkislyf sem minnka matarlyst með tilheyrandi flökurleika og ógleði. Þessar róttæku aðferðir skila betri og hraðari árangri en gömlu kúrarnir.

Svona skyndimegrun hefur skapað ný-mjóa fólkið sem grennist um 10-50 kg á stuttum tíma og ræður sér ekki fyrir fögnuði og stolti. Ný-mjóir láta allan heiminn vita hvað þeir hafa lést mikið og hvernig þeir fóru að. Þeir segja óbeðnir frá flóknum magaaðgerðum og stöðugri ógleði og breyttu mataræði. Ný-mjóir minna á nýfrelsaða Hvítasunnumenn sem fundið hafa lausnina og segja öllum heiminum frá endurfæðingu sinni með sælusvip.

Venjulegu fólki finnst ný-mjóir skelfing leiðinlegir. Þeir tala ekki um annað en sjálfa sig, útlit og mataræði. Facebook er full af „fyrir og eftir“ myndum til að leggja áherslu á breytinguna. Lífið verður afskaplega sjálfmiðað og gengur útá að fá sem flest læk, aðdáun og hvatningarorð. Nýja líkamsímyndin og nýr fatastíll er það eina sem skiptir máli ásamt athugasemdakerfinu á netinu.

Við sem erum enn í ofþyngd óskum ný-mjóum til hamingju með árangurinn. Mestu skiptir að njóta þess að sem lengst vera ný-mjór og baða sig í aðdáun umhverfisins og biðja til æðri máttarvalda að kílóunum fjölgi ekki á nýjan leik.