Brynjar Níelsson, samfélagsrýnir, segir engu líkara en þjóðin sé illa haldin af Stokkhólmseinkenninu. Við kvörtun sáran yfir aukinni skattheimtu á einum tíma, en æmtum varla á öðrum tíma. Svo virðist sem við teljum einnig mikilvægt að kjósa R-listaflokkana til að stýra landinu:
„Þegar „Nonni á jarðýtunni“ var samgönguráðherra 2017 vildi hann fara í stórátak í samgöngumálum, sem yrði fjármagnað að mestu með veggjöldum. Með því tækju allir sem notuðu vegina þátt í kostnaðinum, ekki síst erlendir ferðamenn. Benti hann réttilega á að það væri eina leiðin til að koma þessum mikilvægu innviðum í lag. Nú eru liðin 7 ár og lítið gerst og svo komið að erfitt er að komast leiðar sinnar innan þéttbýlis og erum öll í stórhættu á vegum landsins,“ segir Brynjar.
Vísar hann þar til félaga síns Jón Gunnarssonar sem var samgöngu- og sveitarstjórnarráðherra frá 11. janúar 2017 til 30. nóvember 2017.
Segir hann þessar hugmyndir Nonna litla hafa fallið í grýttan jarðveg hjá mörgum sem kvörtuðu sáran yfir aukinni skattheimtu og gjaldtöku á bifreiðaeigendur.
„En það heyrist ansi ámátlegt væl yfir stórkostlegri hækkun og fjölgun bílastæðagjalda hjá borginni. Nú er svo komið að það er ekki hægt að heimsækja vini og vandamenn eða opinberar þjónustustofnanir, sem eru að vísu sérstaklega settar á stofn til að íþyngja okkur, án þess að borga mörg þúsund krónur í hvert skipti. Í ofanálag virðast landsmenn telja mikilvægt að kjósa R-lista flokkana til að stjórna landinu. Það er eins og við séum illa haldin af Stokkhólmssyndrómi.“
Samkvæmt Vísindavefnum er Stokkhólmsheilkennið hugtak sem vísar til jákvæðs tilfinningasambands gísls við gíslatökumann sinn. Það var sænski geðlæknirinn Nils Bejerot (1921-1988) sem skilgreindi hugtakið fyrstur árið 1973, þegar hann aðstoðaði sænsku lögregluna að upplýsa bankarán sem var framið í Kreditbanken í Stokkhólmi sama ár. Bankaræninginn Jan Olsson hélt þar ásamt öðrum manni, þremur konum og einum karli í gíslingu í sex daga. Gíslatökumennirnir sendu gíslana meðal annars ítrekað inn í rammgerða bankahvelfingu, íklædda sprengjuvesti með dýnamíti og með snöru um hálsinn.
Þrátt fyrir þessa meðferð komu gíslarnir gíslatökumönnum sínum til varnar og neituðu að vitna gegn þeim fyrir dómi. Einn gíslanna stofnaði meira að segja málsvarnarsjóð til aðstoðar gíslatökumönnunum og sumir segja að annar gísl hafi gengið að eiga Jan Olsson (Strentz, 1980).